#JYISGENOEG RAAK ELKE VROU

Onlangs het ’n vriendin vir my ’n SARIE as geskenk gegee en ek was diep geraak deur die #JyIsGenoeg op die voorblad.

My naam is Lenay. Ek is as baba aangeneem. My lewe is gevorm deur een naelstring, twee ma’s en baie jare tussenin. My aanneemouers was van die begin af eerlik oor my aanneming. Met verloop van tyd was daar die voorspelbare gevoelens van rou en verlies. Gevoelens van minderwaardigheid. Niemand se skuld nie; bloot die omstandighede van ons lewens.

Dit neem my veertig jaar om my stem te vind en ek besluit om ons storie te verwoord. Ons memoires, Goed Genoeg, gaan oor die emosionele pad na genesing uit die oogpunt van die aanneemma, die biologiese ma, die aangenome dogter en die maatskaplike werker. Drie vroue. Een wond. En een stem. Goed Genoeg is ’n storie oor drie gesinne wat deur omstandighede één word. Die emosionele reis na waardigheid: na goed genoeg voel.

Dankie, SARIE, vir die bevestiging dat die tema van ons storie een is wat elke vrou raak! Ons sien uit na die heling wat aan die einde wag.

Lenay Schoeman,

Port Elizabeth

Skryf aan SARIE, My sê tel, Posbus 1802, Kaapstad 8000, of stuur e-pos na: mysetel@sarie.com. Nie meer as 300 woorde nie, maar ons behou die reg voor om briewe te verkort. Menings uitgespreek in lesersbriewe is nie noodwendig dié van SARIE nie. Ons plaas nie gedigte, briewe oor reünies of vermiste mense nie. REËLS: Briewe (ook e-posbriewe) moet ’n volledige posadres, kontaknommer en volledige doopnaam bevat. Dit moet ook oorspronklik wees en mag nie aan ander tydskrifte voorgelê word nie. En jy moet onderaan jou brief aandui: NET AAN SARIE GERIG.