Een kursus, verskeie opsies
Die skoonheidsbedryf is nou selfs belangriker as tevore en met dié kursus van die Isa Carstens Akademie ontsluit jy vele moontlikhede
Die jaar 2020 was uitdagend, deurmekaar, met verandering ons enigste konstante. Die moeilikste was dat ons nie aan mekaar kon raak nie. Die wêreld het ’n kontaklose plek geword waar aanraking ’n taboe is, en ons welstand het daaronder gely. Talle besighede moes hul deure sluit of mense aflê, en vrae het ook ontstaan oor die skoonheidsbedryf se voortbestaan en volhoubaarheid.
Isabel Carstens, eienaar en direkteur van die Isa Carstens Akademie, sê die angs en onsekerheid asook verlies aan kontak tussen mense is juis waarom die skoonheidsbedryf – wat lankal nie net gaan oor mooi wees nie – nou ’n nog groter rol het om te speel as tevore. Daar is twee redes hiervoor, volgens haar.
Aanraking
Dit is so ’n eenvoudige beginsel, maar hou soveel voordele vir ons in: Dit verskaf emosionele energie, verbeter ons bui (dink maar aan hoe jou liggaam reageer op ’n massering of gesigsbehandeling wanneer “goedvoel”-hormone vrygestel word), skep ’n gevoel van versorging en omgee, en laat ons ontspan. In ’n tyd van verhoogde angs en selfs depressie is daar ’n reuse-behoefte aan opgeleide terapeute wat hierdie basiese menslike behoefte in ’n veilige, beheerde omgewing kan vervul. Daarom sal die bedryf nooit oorbodig wees nie.
Werkskepping en loopbaanopsies
Dalk nóg belangriker is die bedryf se vermoë om werk te skep. As daar ooit ’n tyd was om te besin oor wat jy in die toekoms gaan doen, is dit nou. Vir matrikulante was 2020 veral erg – dinge wat voorheen vanselfsprekend gelyk het, word nou betwyfel. Maar as jy ’n loopbaan in die skoonheidsbedryf oorweeg het, is dit juis nou die tyd om so ’n kursus te volg – want die opleiding bied vir jou soveel loopbaanmoontlikhede.
Nie net kan jy ’n terapeut word met ’n kursus wat jou toerus met kennis in anatomie, fisiologie, dermatologie en kosmetiese wetenskap nie, daar is ook die opsie van ’n loopbaan in die administrasie en bestuur van hierdie praktyke.
Administrasie het die afgelope jaar baie belangrik geword vir die terapeut en eienaar van ’n spa, salon en mediese estetikapraktyk. Die ondersteuning wat hierdie rolspelers bied, is van kardinale belang om vloei en bedryfsukses te verseker. Verantwoordelikhede kan enige van die volgende insluit: Ontvangs van en kommunikasie met kliënte
Die bestuur van afsprake
Bemarkingskoördinering
Kantoorbestuur
Basiese rekeningkundige verantwoordelikhede soos om betalings te hanteer en rekenings na te gaan
Die bestuur van verkope
Basiese behandelings soos grimering, haarverwydering, lyfmassering, manikuur, pedikuur en naeltegnologie
Met hierdie agtergrond kan die kandidaat die res van die span bystaan en ondersteun as administratiewe assistent en bestuurder, sowel as instaan vir sekere skoonheidsbehandelings. Die kandidaat is ten volle toegerus om in die skoonheids- of gasvryheidsbedryf te werk met ’n keuse van slegs teorie, of ’n kombinasie van teorie en sekere skoonheidsvakke.