Vir die bederf
DOLLY PARTON, SONGTELLER: MY LIFE IN LYRICS
Dolly Parton (Hodder & Stoughton, R830)
Dié ikoniese countrysangeres vertel haar lewensverhaal en deel staaltjies oor haar loopbaan van 60 jaar. Unieke foto’s en memorabilia uit haar persoonlike versameling word vir die eerste keer met bewonderaars gedeel. Dolly se gewildheid strek oor generasies en sy het ’n verstommende aantal volgelinge op sosiale media: 4,9 miljoen op Twitter, 3,4 miljoen op Instagram en 4,6 miljoen op Facebook. Aanhangers sal ook lees wat die inspirasie was vir van haar liedjies. ’n Pragboek oor ’n merkwaardige kunstenaar.
AERIAL ART
Jay en Jan Roode (HPH Publishing, R980)
Die grootsheid van Afrika word weergegee op die manjifieke lugfoto’s van die egpaar Jay en Jan Roode. Dit het 10 jaar en duisende vliegure geneem om kruis en dwars oor suidelike Afrika te vlieg en die asemrowende woestyn-, kus- en ander natuurtonele op foto’s vas te lê. Jan se grootste uitdagings is die onvoorspelbaarheid om in Afrika te vlieg en die geduld om vir Jay die beste posisie te gee vir die foto’s. Meer by hphpublishing.co.za oor ’n beperkte oplaag versamelaarsuitgawe en kunsafdrukke van die foto’s.
VOETSPORE IN SUID-AFRIKA: ’N REISGIDS
Johan Badenhorst (Protea Boekhuis, R295)
“Dit was ’n reis na die uithoeke van Suid-Afrika ș. . .ț Die soeke na plekke wat ons land spesiaal maak.” Met dié sinne som Badenhorst die reisgids akkuraat op. Op sy nimlike manier lig hy besienswaardighede en nuuswaardighede oor hul bestemmings in die Kalahari, Richtersveld, Namakwaland, Tankwa-Karoo, Klein-Karoo, Baviaanskloof, Wildekus, Suidelike Drakensberg, KwaZulu-Natal se slagvelde, eSwatini, die Wolkberg en die Limpopovallei uit. Post-inperking is die gids perfek om jou eie land te ontdek. Dis maklik om te gebruik, gepak met kaarte, aktiwiteite, verblyfbesonderhede, 4x4-roetes, inligting oor vulstasies, gesondheidsorg en afstande tussen dorpe.
FIELD GUIDE TO THE RENOSTERVELD OF THE OVERBERG
Odette Curtis-Scott, Mike Goulding, Nick Helme et al (Struik Nature, R420)
Die Renosterveld is een van die mees onderskatte streke in die land. Kenmerkend is die uitgestrekte rûens, oortrek met bewerkte landerye. Tog bied die streek vir natuurliefhebbers ’n skatkis van diverse fauna en flora op plekke waar nog oorspronklike plantegroei voorkom; ’n klein oase tussen landerye wat noodsaaklik is vir die oorlewing van plante en diere. Hierdie volkleur-veldgids fokus hoofsaaklik op 980 plantspesies en dui aan watter bedreig word. Die kleiner soogdiere, voëls, reptiele en insekte word kortliks behandel. ’n Juweel vir natuurliefhebbers.
FIND FRIDA
Catherine Ingram, met illustrasies deur Laura Callaghan
(Laurence King Publishing, R385)
’n Kleurryke manier om bekend gestel te word aan die lewe en werk van die flambojante Mexikaanse kunstenares Frida Kahlo, een van die ikone van die 20ste eeu wat steeds oor die wêreld heen inspireer. Die 12 prente verteenwoordig elk ’n belangrike gebeurtenis in haar lewe, bv. haar en Diego Rivera se troudag. In elke toneel kruip Frida weg tussen bekendes soos Patti Smith, Theresa May, Dolce en Gabbana, Naomi Campbell, Kate Moss en selfs Meghan Markle! Dit kos fyn kyk om haar in die stampvol prentjies op te spoor.
WILLIAM KENTRIDGE: WHY SHOULD I HESITATE?
William Kentridge (Thames & Hudson, R5 605)
Hierdie fantastiese reeks is gemik op ernstige kunsentoesiaste en -versamelaars. Die eerste volume gee ’n oorsig van Kentridge se beeldhouwerk, toegelig deur dr. David Freedberg van die Columbia-universiteit, wat die werk in die konteks van sleutelkunsbewegings van reg oor die wêreld plaas. Die tweede volume fokus chronologies op Kentridge se loopbaan van meer as 40 jaar van kuns skep en hoe hy in sy ateljee te werk gaan. Albei volumes is lieflik geïllustreer met syskermafdrukke van Kentridge se kunswerke.