Wêreldgebeure wat ons vorm
Dis nou al ’n jaar sedert die coronavirus ons lewe deurmekaar kom krap het . . . met die einde nog nie in sig nie. Die goue graal, ’n doeltreffende entstof, is binne bereik. Maar met ’n vraagteken oor wanneer dit by my en jou gaan uitkom. Ons kan maar net bespiegel oor hoe ingrypend die virus ons lewe vorentoe gaan verander. Intussen wankel die wêreldekonomie, steier die demokrasie in die VSA en elders, en styg depressievlakke.
Dis sekerlik nie die eerste keer dat ’n gebeurtenis so ’n radikale effek op ons handel en wandel het nie. Trouens, dis onmoontlik om alles hier te noem. Ons sou dan by Adam moes begin, en genoeg boeke op die aardbol is daar nie. Kom ons laat die kollig dus op die Westerse beskawing val.