Natasha Joubert: Mej. Heelal-kroon in haar visier
“Ek gaan Mej. Heelal toe, dis méér as my jaar!”
Natasha Joubert, wat in Oktober by die Mej. Suid-Afrika-wedstryd as tweede prinses gekroon is, berei haar tans voor om later vanjaar haar plek op die internasionale verhoog in te neem. “Ek floreer met alles wat die proses behels.” Volgens haar wil sy graag wys dat sy hardwerkend, doelgerig en passievol is en bo haar omstandighede kon uitstyg.
“Die uitdagings wat jou laat wonder ‘hoekom ek’, is wat jou motiveer en sterker maak,” sê sy. As tiener het haar pa sy werk verloor en moes die gesin afstand doen van die huis waarin sy grootgeword het. Saam met haar pa se ontydige dood daarna was dít ’n draaipunt in haar lewe.
“Ek het modelwerk begin doen om myself finansieel te ondersteun, moontlikhede te ontsluit en myself vorentoe te posisioneer. Reeds van ’n jong ouderdom af het ek geleer hoe om planne te maak.”
Natalia Jefferys, haar ontwerpersonderneming, het sy net ses maande ná skool begin. “Dis regtig hoe ek myself kon opbou en ’n toekoms kon laat realiseer.” Daarom lê entrepreneurskap haar na aan die hart. “My ambisie in die lewe moet aansteeklik vir ander wees.”