Gesig van die maand: Reese Witherspoon
GESIG VAN DIE MAAND REESE WITHERSPOON
Om in die moeilike 2020 op Forbes se lys van top-100- invloedryke vroue te wees is ’n prestasie.
Dertig jaar nadat sy as 14-jarige haar debuut in die 1991-fliek The Man in the Moon gemaak het, is Reese Witherspoon een van Hollywood se suksesvolste aktrises. 2001 se Legally Blonde was haar groot deurbraak, en in 2006 het sy die Oscar as beste aktrise vir Walk the Line ontvang. ’n Paar onsuksesvolle komedies het gevolg, waarvoor sy skerp gekritiseer is. Hieroor skryf sy in 2019 op Instagram: “Rejection teaches you perseverance and how to get tough. And you also learn . . . not every path is right for you.” Sy begin haar eie produksiemaatskappy in 2012 en vervaardig onder meer die fliek Wild. Syself vertolk die hoofrol, waarvoor sy haar tweede Oscarbenoeming ontvang. In 2016 is sy medestigter van Hello Sunshine, ’n mediamaatskappy wat vroue vier en hul stories vertel. Sy vervaardig en speel self in die TV-reekse Big Little Lies, Little Fires Everywhere en The Morning Show, wat in 2020 saam 18 Emmy-benoemings ontvang het. Dié besige ma van drie is ook aktief betrokke by organisasies wat vroue- en kinderregte bevorder, het haar eie boekklub en ’n klerereeks, Draper James.