DIE HERVORMING
Die Duitser Martin Luther spyker op 31 Oktober 1517 sy 95 stellinge teen Wittenberg se kerkdeur vas: Hy bevraagteken die Katolieke Kerk se oppergesag en gebruike. Wat begin as ’n godsdiensstryd, versprei vinnig deur Wes- en Sentraal-Europa as ’n anti-feodale beweging. Uiteindelik lei die Hervorming tot demokrasie, kapitalisme, burgerregte en ander moderne waardes. Die vervolging van die Protestantse Franse Hugenote veroorsaak in 1688-1689 ’n grootskaalse emigrasie na onder meer die Kaap van Goeie Hoop. Ons word aan die Hugenote herinner deur die Franse plaasname in die Boland en die talle Franse familiename dwarsoor ons land.