MEDIESE REVOLUSIE
Tot ’n paar eeue gelede is geglo siektes word deur bose geeste veroorsaak, of is ’n straf vir jou sondes. Louis Pasteur bewys van die middel tot laat 19de eeu mikroörganismes veroorsaak siektes. En maak die ontwikkeling van geneesmiddels vir talle wrede siektes moontlik. Ook ontdek hy hoe om entstowwe van verswakte of gekweekte mikrobes te maak en ontwikkel een teen onder meer die gevreesde hondsdolheid. Penisillien, die eerste antibiotika, word in
1928 ontwikkel teen talle dodelike bakteriële infeksies. Saam met die vooruitgang in chemie en biologie lei dit tot die era van moderne medisyne. Prof. Christiaan Barnard slaag op 3 Desember 1967 met die wêreld se eerste hartoorplanting en sny só vir SA ’n plek in die mediese geskiedenis oop. Die 21ste eeu bring natuurlik sy eie uitdagings, soos bakterieë wat hul spiere teen antibiotika bult en die superkiem.