DIE SPAANSE GRIEP
Feitlik alles het tot stilstand gekom. Winkels was leeg en voor apteke het lang rye mense gestaan. Die strate was verlate . . . Nie Covid-19 nie, maar die Spaanse Griep. Lyke het op sypaadjies gelê om afgehaal te word, want lykshuise was oorvol. In Kaapstad is dooies in komberse in massagrafte op Woodstock se strand (sowaar, daar was een!) begrawe. Die pandemie eis sowat 40 miljoen lewens wêreldwyd en lei tot ’n groot behoefte aan mediese vooruitgang en die ontwikkeling van entstowwe.