Kuberkuier: Cobham, Engeland
Ver genoeg van Londen om skape te sien wei, maar naby genoeg as jy die stadsliggies mis. Lynda Smit vertel van haar verblyf in die bosryke Surrey, Brexit en ‘die stywe bolip’
Wat doen jy?
Ek is bevoorreg om die rol van vrou, ma en tuisteskepper te kan vervul. My man, Winston, werk vir ’n internasionale farmaseutiese maatskappy in Londen en ons woon al ses jaar hier. Ons het twee seuns, Winston (10) en Oliver (9), wat beteken ek was die afgelope jaar tydens die pandemie ook ’n onderwyseres.
Wat maak Surrey anders as die ander graafskappe?
Surrey bied die beste van twee wêrelde. Dis in die bosrykste streek in Engeland, bekend vir pragtige natuurtonele. Cobham, die dorpie waar ons woon, is gewild onder stappers en rolprentvervaardigers. Tonele uit Bridget Jones: The Edge of Reason en The Holiday is byvoorbeeld hier verfilm. Vir ons as Suid-Afrikaners wat gewoond is aan ruimte, is dit perfek en voel dit ’n bietjie soos “huis” in Engeland. Dis ’n voorreg om ons seuns in so ’n mooi landelike omgewing te kan grootmaak waar hulle op pad skool toe skape kan sien wei. Londen is net 40 minute per trein weg vir as ons hunker na die stad se liggies.
Hoe ervaar julle die Britse weer?
Die somer is pragtig maar van korte duur, en die winter is koud en nat. Dit bly vir ons ’n groot uitdaging. Dis egter ’n lekker aanknopingspunt vir ’n geselsie as jy dorp toe gaan.
Die kuns om warm te bly lê daarin in om verskeie lae (termiese) klere te dra en winterklere van goeie gehalte aan te skaf.
Ná vier jaar se bibber, het ek vir my ’n Burberry-jas gekoop – dit was verreweg my beste aankoop!
Ons het verder in gehaltebeddegoed belê wat ons liggaamstemperatuur behou en isolasie bied vir die koue nagte. Ons binnenshuise verwarmingstelsel is die hele jaar aan, wat vir die Britte malligheid is aangesien hulle dit slegs in die winter aanskakel. Die temperature verander voortdurend en ek is altyd voorbereid vir al die seisoene op een dag, gepantser met ’n sonbril en ’n sambreel.
Die meeste Britse huise het stewelkamers by die voordeur waar jy jou nat en vuil Wellies kan stoor. Hierdie skoene is in elke moontlike kleur beskikbaar en ’n besliste moet vir die winter.
Die weer kan jou bui erg beïnvloed. Daar is werklik iets soos seisoenale gemoedsteuring, daarom drink ons daagliks vitamien D-aanvullings.
Die Britte is lief vir bloedwors (black pudding). Het jy ’n smaak daarvoor ontwikkel?
Glad nie! Bloedwors is basies hawermeel met geursel, wat uie, Ierse beesvet, water, vleisbloedpoeier, sout, aartappelstysel en speserye insluit. Ek bly verstom dat dit saam met ontbyt geëet word, hoewel die plaaslike mense dalk dieselfde voel oor ons wat biltong as peuselhappie geniet.
Tradisionele geregte wat ek wel geniet, is ’n Sunday roast met Yorkshire pudding, toad-in-the-hole (wors in deeg), vis en tjips, herderspastei, varkworsies en kapokaartappels, ’n tipiese Engelse ontbyt met sousbone en haggis (afval).
Sokker is groot. Hoe fanaties is die mense daaroor?
Hier is meer as 40 000 geregistreerde sokkerklubs in Engeland. Om te sê sokker is ’n manier van lewe sal ’n onderbeklemtoning wees. Dit wek ’n vlak van passie en kameraadskap wat jou sal verbaas as jy nie ’n sokkerspan ondersteun nie. Die keuse van ’n span is dikwels ’n familiesaak. Sodra jy ’n span gekies het, is dit ’n lewenslange verbintenis – deur dik en dun!
Ons bly op dieselfde dorp as die Chelsey-span, ’n groot bonus vir die seuns. Die WAGS is die spelers se vroue en hulle verskaf my ure se vermaak en ek kry mode-inspirasie by hulle.
Hoe beïnvloed Brexit julle?
Ons het nog nie ’n groot verskil gesien nie, maar ons ervaar wel dat die gehalte van vars produkte ’n bietjie afgeneem het en die prys van ’n mandjie kruideniersware ’n pond of twee gestyg het. Daar is egter verborge koste wat ons op die langer duur sal raak.
As gevolg van ons Suid-Afrikaanse paspoorte (ons gaan later vanjaar vir Britse paspoorte aansoek doen) het ons in elk geval visums nodig om te reis. Dus beïnvloed dit ons nie in dié opsig nie.
Die Britte is bekend vir hul stiff upper lip. Hoe ervaar jy hulle?
Net so, onemosioneel, koud en stug – nie warm en ontvanklik nie. >
< Die frase “hou ’n stywe bolip” het ’n interessante oorsprong. Dit word gebruik om iemand te beskryf wat vasberade en onemosioneel bly as teëspoed hulle tref. Wanneer die bolip bewe, is dit ’n teken van swakheid en vandaar die gesegde.
Ek het wel ’n paar goeie Britse vriendinne gemaak wat my help om die kultuur en tradisies beter te verstaan.
Is die aksente en dialekte soms moeilik om te verstaan?
Waar ons woon, is dit nie so ’n groot probleem nie omdat die aksent wat in die home counties (histories die graafskappe om Londen) gehoor word, die naaste is aan wat jy Queen’s English noem. Dit staan ook as Received Pronunciation (RP) of Standard English bekend.
My eie kinders sukkel egter soms om my Engels te verstaan en voel skoon skaam vir hul ma as ek voor hul maats Engels praat. Ek neem aan dis maar wat gebeur as ’n Afrikaanse meisie in Pretoria leer Engels praat!
Gewilde plekke om te besoek?
Toeriste besoek graag plekke soos die Cotswolds, Bath, Oxford, Cambridge, Cornwall en Devon. Die nuutste plattelandsensasie is die Newt-hotel in Somerset, wat dieselfde eienaars as Babylonstoren naby die Paarl het.
Die eeue-oue kroeë op klein dorpies en high tea by groot hotelle in Londen is nog hoogtepunte, so ook besoeke aan afdelingswinkels soos Harrods, Selfridges en die speelgoedwinkel Hamleys.
Hier in Surrey is gewilde naweekaktiwiteite Dorking se antiekwinkels, die Garsons-plaasmark, die Denbieswynplaas, die Brooklands-museum (in die Netflix-reeks The Crown te sien) en Hampton Court (die paleis van Henry VIII). Op my emmerskoplys is die jaarlikse Epsom-derby in Junie, die grootste op die kalender en een wat deur koningin Elizabeth bygewoon word.
Bekostigbare uitstappies vir SA besoekers?
Engeland is bestrooi met klein dorpies wat eeue oud is. Besoekers kan vir ure rondloop en die argitektuur en ryk geskiedenis geniet.
Daar is ook baie dinge wat jy in Londen kan doen sonder dat dit jou rande gaan opvreet. Daar is ’n groot verskeidenheid vlooi-, blomme- en kosmarkte. Jy kan ’n toebroodjie of slaai by ’n supermark koop wat perfek is as jy langs die Teemsrivier en op die South Bank wil gaan stap of in een van die stad se vele parke wil piekniek hou.
Daar is ’n magdom museums, galerye en kerke sonder toegangsgeld, en die Tower of London laat elke aand om 21:30 tot 50 mense gratis ingaan.
Ander dinge wat elke besoeker aan Londen moet sien, sluit in Platform 9¾ by die King’s Cross-stasie (waar Harry
Potter op die Hogwarts Express geklim het), Piccadilly Circus, Buckinghampaleis, Trafalgar Square, Abbey Road (vir die Beatles-aanhangers), Regent-, Bonden Oxfordstraat en al die pragtige brûe.
Hoe het die pandemie jou wêreld verander?
180 grade! Netflix en aanlyn inkopies het my lewensredders geword.
Ons is buitelugmense en voorheen sou ons ons nie kon indink hoe dit sou wees om in jou eie huis gegrendel te wees nie. Vir ons is dit belangrik om jou tenk vol sonlig te maak. Ons Kersfees was donker en nat en ons het Suid-Afrika en son op ons gesigte gemis.
Ons moes kreatief begin dink om die seuns besig te hou. Een van ons aktiwiteite was ’n gesinskunskompetisie en ek het in ’n kranige bakster ontaard.
’n Onlangse Britse artikel meen vandag se kinders sal die veerkragtigste generasie ooit wees. Hulle sal innoverende oplossings vind en hindernisse afbreek soos niemand voor hulle nie. Dis vir ons belangrik dat ons seuns die grendeltyd positief ervaar en die tyd gebruik om hul identiteit op te bou.
My man het voorheen 90% van die tyd vir sy werk gereis – nou is ons permanent in mekaar se geselskap. Dit was ’n aanpassing. Ek het geleer dat verhoudings nie altyd maklik is nie, maar dat die instelling van die huwelik ’n skat is wat die moeite werd is om voor te veg.
Kom julle terug SA toe?
In ’n oogwink. Ons is daartoe verbind om ’n goeie en gelukkige toekoms vir ons en ons seuns te skep. Ek weet ons kan oral gelukkig wees, want huis is waar die hart is. Soos die pandemie gewys het, weet ons nie wát die toekoms inhou nie, maar ek weet wié die toekoms inhou en dit is genoeg.