Armand IEWERS ‘TUSSEN ’N HUNK EN ’N NERD’
Hy het vroeg opgedaag en waai al deur die koffiewinkel se venster. Armand Aucamp (34) teug aan ’n rooi cappuccino met amandelmelk. Ene banting. “Bestel vir jou ook een, dit voel soos ’n drukkie,” sê hy. Drukkies ís so skaars in die Covid-tyd.
Tot onlangs het Armand die hoofrol in die kykNET-reeks Die Boekklub vertolk.
Hy dra ’n modieuse bril en lyk vandag nes ’n (aantreklike) nerd so voor sy oopgeslane skootrekenaar. Sy spiere bult nie te veel nie en hy is slank. Hy het ’n skoon, oop gesig, soos ons oumas sou sê, en is hoflik. Hy onthou ook jou naam. Sy tweede kookboek, Armand kook kaal: Volume 2 –
50 banting-resepte, het ’n rukkie terug verskyn en hy begin reeds resep-idees vir ’n moontlike derde een neerpen. Op die voorblad van die tweede een het hy weer ’n voorskoot aan. Sy naakte bolyf sigbaar.
Dra hy iets onder daardie voorskoot?
Hy lag. Hy is darem nie geheel en al naak wanneer hy op ’n voorblad pryk of sy self-ontwikkelde resepte tydens demonstrasies of vir TV aanbied nie. >
< Armand is energiek, byna hiperaktief, en sê sy kop is helder sedert hy die banting-leefstyl volg. Tog raak hy opgewonde oor ’n pizza op die tafel langsaan. Ja, hy oortree wel soms, want dan het sy vriende “moeite gedoen met die kos”.
Hy oefen soggens vroeg in die gim, vandaar die netjiese lyf. Maar tog voel hy soms blootgestel. Soos toe ’n vrou hom gevra het om op haar bors te teken, terwyl ’n ander een van agter af sy “love handles” beetgekry en gevra het: “Wat is dit nou dié?”
Soms voel hy inderdaad vet en onaantreklik. “In ons bedryf is daar konstante vergelyking, ‘jy is mooier, hy is mooier’, maar dalk het die regisseur net ’n ander voorkoms gesoek.”
Armand is steeds opgewonde oor die derde reeks van
Die Boekklub, wat ten tyde van ons onderhoud kykers in ’n beswyming gehad het. “Ek het nooit gedink die derde reeks gaan gebeur nie. Ek het skoon bewoë geraak – ek huil maklik – want dis my gunstelingreeks ooit. Ek is geheg aan Tom Niemandt, my karakter, die mense saam met wie ek werk en die storie. Louis Pretorius skryf so goed. Die karakters is driedimensioneel. Jy kan hul name in die teks toedruk en jy sal steeds weet wie praat.”
Hy toon wel ooreenkomste met Tom. “Ek sit ’n bietjie van myself in hom en hy in my.” Armand is ewe lief vir lees, “maar deesdae lees ek soveel tekste en leer soveel woorde dat ek te min ander goed lees. Ek scan wel aktuele artikels.” Sy ma, Petra, ’n oud-dosent in Afrikaans, lees “vier tot vyf boeke” per week. So het die Aucamp-kinders grootgeword. Hy het ’n suster, Marcelle, en ’n broer, Christoff. Sy pa, Chris, is ’n historikus. “Ons is ’n hegte gesin.”
Sy karakter in Die Boekklub is ’n “uitlaatklep” vir Armand se gedagtes. “Tom sê dit wat ek nie die guts het om te sê nie. Sy frustrasies lê vlakker as myne. Hy gee dit mag.”
Armand is eerder vriendelik, eerlik en snaaks. Hy is boonop ’n akademiese presteerder (A’s op Paul Roos Gimnasium, Stellenbosch), het drama gestudeer by CityVarsity, speel klavier en doen navorsing. “Ja, ek is seker ietwat intellektueel ingestel.” Hy “hiperfokus” op sy belangstellings, waaronder wetenskap, voedselkunde, voeding en gesondheid. “Ek is
’n Jack of all trades, but a master of one,” grap hy.
In wese nie ’n sekssimbool nie.
Maar hy is gereeld op foto’s sonder hemp?
“Ja, ek neem net nie die sekssimbool-ding ernstig op nie.
I just went with it.” Dit het gebeur toe hy die aantreklike Gavin van den Berg se rol as Jacques Rynhard in Ballade vir ’n enkeling oorgeneem het. Maar eintlik is hy iewers tussen ’n hunk en ’n nerd, sê Armand.
Dié akteur het al in vele TV-reekse gespeel, waaronder Kompleks, Fynskrif en Knapsekêrels. Flieks sluit in Stroomop en Krotoa, asook ’n paar internasionale produksies. Hy het skouers geskuur met Amerikaanse akteurs soos Idris Elba en Cuba Gooding Jr.
Armand het ’n besonderse teenwoordigheid op kamera, maar is soms ook verhoogakteur. Hy het die hoofrol vertolk in Shakespeare se The History of Cardenio wat in die Maynardville-opelugteater naby Kaapstad opgevoer is. “Shakespeare is enige akteur se droom. Sy taal is net beautiful.”
Die “briljante” aktrises Rolanda Marais en Sandra Prinsloo is sy ikone. Sy droom om saam met Sandra te werk word in Mei waar wanneer hulle in die internetsepie Die dag van môre optree.
Volgende jaar speel hy die rol van ’n musikant in ’n nuwe fliek, Mense van die wind. Hy sê hy was gespanne omdat hy nog nooit as akteur gesing het nie. (Die uitreikingsdatum is nog nie bekend nie.)
Hy skuif sy stoel eenkant en koes-koes. Daar is ’n by teen die ruit. Armand is allergies en het nie sy pille by hom nie. Gelukkig teiken die by hom toe nie.
Die akteursberoep kon een van sy talentvolste akteurs verloor het!
Jy kom so opgekikker en positief voor. Het jy in so ’n huis grootgeword of werk jy daagliks daaraan?
Wanneer ’n negatiewe situasie opduik, het my pa altyd gesê dit is sleg, ja. Maar hoe gaan jy dit na positief verander?
Later doen jou brein dit outomaties. Ek is energiek, want die banting-leefstyl sorg dat my bloedsuiker nie meer so op en af is en ek slaperig voel nie.
Jy pak die een projek ná die ander aan terwyl so baie akteurs sukkel om werk te kry.
Ek hét baie werk en is ongelooflik dankbaar daarvoor. Soms het ek stil periodes, maar danksy al my projekte het ek dan nie finansiële bekommernisse nie. Ek het vir ’n lang tyd hard gewerk en só ’n soliede fondament gelê. Die filmspan kan op my staatmaak en ek ken altyd my woorde. Solank as wat ek op aarde is, wil ek toneelspeel.
Inperking lei tot kreatiwiteit. Jy en jou ma het ’n klankopname met die naam Inblykonsert: Kaggels, kerse en kinderstories gemaak. Hoe het dit gebeur?
Ek het na ’n oudioboek geluister en só die idee gekry. My ma het drama geswot en het ’n pragtige stem. Ons het apart opgeneem want ons was nie by mekaar nie. Daarna het ek alles geredigeer. Ek is baie trots op die projek.
Jy het seker ’n spesiale plekkie vir kinders?
Kinders is wonderlik. Ek wil graag my eie hê.
Jy het self Covid gehad. Is jy oukei?
Ek was aan die skiet aan Die Boekklub toe ek ontsaglik moeg begin voel en pyn in my rug gehad het. Ek het aanhou werk. Teen die tyd dat ek ’n Covid-toets gehad het, was ek al byna gesond.
Hoe het die virus die bedryf en jou lewe verander?
Die teaterbedryf is op sy knieë gedwing. Teaters soos The Fugard en Die Boer het gesluit. Baie mense in die bedryf, ook plekaanwysers en tegnici, het hul werk verloor. Die filmen TV-bedryf oorleef wel, maar het onpersoonlik geword.
Dis net maskers, handreinigers, Covid-syfers en slegte nuus waar jy kyk. Dit druk maar swaar op die gemoed. Wanneer jy snags alleen in jou bed lê, is jy onderliggend angstig. Ek weet ook nie wanneer laas ek my ma ’n behoorlike druk kon gee nie.
Jy en drie vennote het Koer begin, die eerste Afrikaanse afspraak-app. Julle het reeds 17 000 intekenare. Hoe het die idee ontstaan?
Omdat ek alleen werk, soos wanneer ek woorde leer, wou ek graag ’n besigheid saam met ander begin sodat ons idees kan uitruil. ’n Vriendin het op ’n dag vir my gesê sy wil graag ’n doodgewone Afrikaanse boerseun hê. Dis hoe ek Koer begin het. Ek is verantwoordelik vir die bemarking, die daaglikse administrasie en onderhandeling met kliënte. Koer is soos ’n babatjie wat jy heeldag moet skoonmaak en voer.
Jy het vanselfsprekend ’n ding oor Afrikaans.
My alles is te danke aan Afrikaans. Ek was eers in ’n Engelse skool en ’n Engelse kerk. Ek het in Engels toneelgespeel. Tuis het ons Afrikaans gepraat. Later het ek my liefde daarvoor herontdek. Afrikaans is ’n ongelooflike taal.
Daar is nou ’n regte restaurant met die naam Die Boekklub op Merweville waar julle geskiet het. Maak hulle goeie kos?
Superlekker! Wanneer ons Saterdagaande af was, het hulle vir die hele span ’n geselligheid gehou. Ons het heerlik gekuier. Uit ’n bemarkingsoogpunt is die eetplek ’n uitstekende idee. Nicolene Diedericks van Merweville het dit begin. Dit bring ook ietwat van ’n stadselement platteland toe.
Hoe verskil jou tweede kookboek van die eerste een, Armand kook kaal: ’n Banting- en keto-kookboek, ’n topverkoper wat vier maal herdruk is?
Ek is destyds aan die diep kant ingegooi. Met die tweede boek was ek meer op my gemak en het ek meer selfvertroue gehad. Die resepte is vereenvoudig want ek het agtergekom dat bestanddele soos amandelmeel nie sommer op die platteland te vind is nie. Dit is dus meer verbruikersvriendelik.
Jy het onder groot druk gewerk?
Ek was betrokke by van die uitleg tot by foto-stilering. Ons het net vyf dae gehad om die foto’s te skiet. Die begroting was klein. Daar was ook nie geld vir assistente nie. Ek het soos ’n besetene gekook. Jy klits ’n eier terwyl jy die bak in die lug hou. Terselfdertyd klop jy iets met jou ander hand.
Waar het jou liefde vir kook ontstaan?
By my het dinge andersom gewerk. Ek het eers doodgewone homestyle-kos gemaak. Ek was nie ’n amateursjef nie, maar omdat ek ’n byna obsessiewe belangstelling het in voeding en gesondheid, asook dit wat in die brein gebeur, het ek geregte op ’n banting-manier begin maak. Elma Smit, ’n vriendin en TV-aanbieder, het my entoesiasme met Marida Fitzpatrick van LAPA Uitgewers gedeel en Marida bel my toe.
Jy is lief vir musiek, veral jazz, en het reeds op vier begin klavierspeel.
Lydia van Wyk, toe in die destydse standerd agt, het my geleer. In my oë was sy ’n grootmens. Toe ons in 1996 van Fort Beaufort af Stellenbosch toe trek, het ek formeel klavierlesse by die skool begin neem.
Wat is jou swakste en beste eienskappe?
Ongeduld is my swakste eienskap, dinge moet dadelik gebeur. Daar is ook nie duisend ongelese e-posse in my inbox nie, net drie. Ek sou sê my beste eienskap is integriteit en ek behandel mense met respek.
Wat was die moeilikste tyd van jou lewe?
Om aan te kondig ek is gay. Ek het 24 jaar lank met my seksualiteit geworstel voor ek my ouers vertel het. Jy vrees verwerping, maar my ouers het net aanhou lief wees vir my. Ek het eers twee jaar gelede in die openbaar “uitgekom”. Ná ’n leeftyd van onderdrukking wou ek my gay-wees van die dak af skree. Ek is nou vry, ek hoef myself nie meer te sensor nie. Ek kan na klassieke musiek luister en enige hemp kies sonder dat ek my hoef te bekommer dat ander gaan dink ek is gay.
Het jou gay-wees jou loopbaan skade berokken?
Daar was min kritiek, maar ek was baie selfbewus. Een aand, by ’n Armand kook kaal-geleentheid, was daar ’n oom, twotone-hemp en al. Hy het my intens aangegluur. Hier kom dit nou, het ek gedink. Maar toe sê hy vir my sy seun is gay en dat my storie so baie vir hulle beteken. Ek dink ek is nou ’n beter akteur en niks hou my terug nie.
Het jy raad vir ander ouers wie se kind “uit die kas klim”?
Mens moet hulle en ander kans gee om dit te verwerk. Ek wil vir ouers sê jy weet nou net iets wat jy nie voorheen geweet het nie. Niks het verander nie. Dis steeds jou kind. Wees dankbaar dat hy (of sy) eerlik was.
Jy het reeds jou toon in die Hollywood-water, maar deesdae is die rooitapyt-geleenthede weg. Daar was die Harvey Weinstein-ding en verskeie aktrises het oor hul seksuele en emosionele teistering gepraat. Boonop kry swart akteurs steeds min groot rolle, ’n skandvlek op Hollywood se naam. Beplan jy om daar te gaan woon?
Hollywood as we know it, is over. Ek was op pad soontoe. Ek het reeds aansoek gedoen vir ’n groenkaart en moes nog net bewyse binnelandse sake toe stuur. Ek het nie. Toe gebeur die kookboek en Die Boekklub. Ek benut eerder die geleenthede hier. Netflix koop oral reekse aan. Jy hoef ook nie in Amerika te woon om in ’n internasionale reeks of fliek te kan speel nie.
Wat wil jy nog doen?
Regie. Ek werk graag met akteurs en wil hul beste spel na vore bring. Filmredigering en om musiek in te span om emosies te beklemtoon is nog gunstelinge.
Het jy persoonlike drome ook?
Ek sou eendag ’n huisie teen die see wil hê. Dalk op Waenhuiskrans. Of ’n stukkie grond met hoenders en ’n koei op Greyton of Riebeek-Kasteel. Ek wil graag my eie botter maak.
Met die wegstap wil mens hom ’n drukkie gee, maar dit mag mos nie. Daarby het ons klaar ons cappuccino’s gehad.