Die klassieke Toyota Corolla kry ’n nuwe baadjie
Een van die topverkoper-voertuie van alle tye het pas beter geword. Ontmoet die nuwe, verbeterde Toyota Corolla
Sedert sy bekendstelling in 1966 het die Corolla een van die bekendste motorhandelsmerke in Suid-Afrika, indien nie in die wêreld nie, geword. Nou, vir sy 12de generasie, kombineer Toyota opwindende nuwe ontwerp-elemente met die beproefde kenmerke van die Corolla-handelsmerk.
ONTWERP WAT DIE KOPPE LAAT DRAAI
Die nuwe Corolla-sedan het ’n ontwerp wat jy nie kan miskyk nie. Die voorkant lyk baie soos dié van die luikrug met die kenmerkend gevormde ligte en drie-blok-ontwerp. Die bestuurder het nou beter sig danksy die dunner A-pilare en ’n laer paneelbord en enjinkap. Dis in agt kleure beskikbaar.
AAN DIE BINNEKANT
Sy afwerking is eenvoudig, maar elegant, met ’n titsel metaal om die oog te tref. Die kontrasterende blou steke op die bekleedsel sorg vir ’n sportiewe gevoel en komplementeer die blou beligting op die instrumentpaneel. Die voorste sitplek het ook ’n nuwe voorkoms gekry met ’n riffelpatroon.
HOE BESTUUR DIT?
Danksy veranderinge in die ontwerp het die Corolla ’n bietjie gewig afgeskud, wat dit ratser op die pad maak (en meer brandstofdoeltreffend). Die veranderings in die veringstelsel sorg vir meer stabiliteit, ook as jy oor ongelyk oppervlakke bestuur.
ONDER DIE ENJINKAP
Die Corolla-sedan is nou in twee enjin-opsies beskikbaar. Die vorige generasie enjin was ’n 1.8-liter wat 103 kW krag en 171 Nm wringkrag gelewer het.
Die ou Corolla het ook ’n 7-spoed-Shiftmatic-CVToordragratkas met 7 vooraf geprogrammeerde stappe gehad. Die nuwe 2.0 liter-Dynamic Force-TNGAenjin lewer nou 125 kW krag en 200 Nm wringkrag, en jy kan kies tussen ’n 6-spoed-outomatiese en 10-spoed-Shiftmatic-CVT-ratkas. Die amptelike brandstofverbruik vir die 1.8 liter is 6,2 l/100 km, vir die 2.0 liter-handrat (6,5 l/km), en vir die 2.0 liter-CVT is dit 6,0 l/100 km.
TWEE VLAKKE, DRIE MODELLE
Daar is twee afwerkingsvlakke beskikbaar: XS en XR. Die XR-model is die vlagskip en slegs beskikbaar met die nuwe 2.0 liter-Dynamic Force-enjin. Jy het ’n keuse tussen die handrat- en outomatiese ratkas. Die 1.8 XS is die intreevlakmodel in die reeks.
DIE TEGNOLOGIE
Die nuwe Corolla-sedan het ’n raakskerm met Apple CarPlay en Android Auto. Jy het ook klimaatbeheer met eko-modus, ’n tru-kamera, sitplekverstelling, elektroniese vensters, sleutellose toegang, verstelbare stuurwiel en kruisbeheer. Die XR-modelle het voorts ’n truspieël wat outomaties verdof.
VEILIGHEID
Alle modelle het sewe lugsakke as standaard, Isofix-punte (vir babastoeltjies), en elektroniese veiligheidshulpmiddels soos sluitweerremme, elektroniese stabiliteitsbeheer, remhulp (BAS), glyvoorkoming (VSC) en heuwelwegtrekbeheer (HAC). Die vlagskip-XR-model het Toyota Safety Sense (TSS), ’n volledige bestuurderbystandstelsel. Die XR het ook Bi-LED-hoofligte.