Sakpas rygoed
MET ’N SPORTNUTS-JASSIE
WILMER MÜLLER VERSKAF
Dit klink ’n bietjie soos ’n plaat wat vashaak om te sê dat sportnutsvoertuie deesdae die voertuigkeuse van Jan Alleman is. Tog is ’n blinknuwe sportnuts se prysetiket bo talle se vuurmaakplek, maar dit keer nie vervaardigers om sakpas rygoed ’n sportnuts-jassie aan te trek nie . . . Twee sulke motors is die indrukwekkende Ford Figo Freestyle en Suzuki se baie gewilde Ignis, wat ek onlangs toetsbestuur het.
< FORD FIGO FREESTYLE
Dié gespierde buksie is op Ford se Figo-luikrug gebaseer, maar met talle sportnuts-onwerpeienskappe opgekikker. Só is die grondvryhoogte van die Freestyle sowat 2 cm hoër en is dit gepantser met swart plastiekbeskermingstroke op die bakwerk, dakrakke en silwer skermstroke onder die buffers. Ons het die deftiger Titanium-model toetsbestuur met onder meer ’n raakskerm-multimediastelsel, klimaatbeheer, elektriese vensters, ses lugsakke en ABS-remme. Onder die enjinkap is ’n bekwame 1,5-literdriesilinder-petrolenjin en volgens Ford is die gemiddelde brandstofverbruik 5,5 liter/100 km. Die Figo Freestyle is ’n oulike ryding wat vertroue inboesem op die pad. Pryse begin by: R241 100.
SUZUKI IGNIS >
Met sy parmantige voorkoms is die Ignis ’n voertuig wat uitstaan in die sakpas-segment. In GLX-gewaad, wat ons gery het, is dit goed toegerus met talle geriefskenmerke. Suzuki span ’n 1,2-liter-petrolenjin in, wat goeie verrigting bied. Dit sorg boonop vir lae brandstofverbruik en volgens Suzuki is die handratmodel s’n net 4,9 liter/100 km. Die Ignis is ’n motor wat ’n glimlag op jou gesig sit – nie net vanweë sy windmaker-voorkoms nie, maar omdat dit rats op die pad voel en maklik is om te bestuur. Pryse begin by: R193 900.
Lees die volledige artikel op SARIE.com