HUIL JY OF HELP JY?
Ek lees die artikel “Huil jy? of help jy?” in SARIE se Mei/Junieuitgawe en besef empatie is mooi en nodig, mits dit gebalanseerd is. Hipersensitief van geaardheid ervaar ek dat empatie soms ongesond en oordrewe kan wees. Dit sluk jou in en veroorsaak dat jy in die pyn en situasie van die ander persoon vasgevang word. Dit is oorweldigend, jou denke word oorheers en jy word later apaties.
Vroeg reeds met my kinders het ek ervaar dat ek te swaar dra aan hul teleurstellings en seer. Ek wou hulle beskerm, sonder die besef dat dit ’n nodige deel van hul ontwikkeling is. Hul pyn word jou pyn, en jy wroeg dae lank om vir hulle oplossings te kry. Jy verontreg jouself en dis nie noodwendig tot hul voordeel nie. Versterk, bemagtig en ondersteun, maar nie ten koste van jouself nie. Jy het ook ’n verantwoordelikheid teenoor die self.
Elmien, Sandbaai