Musings Pieter Mathews en span (Protea Boekhuis, R350)
Argitektuur is ’n konkrete erfenis, ’n aanduiding van tydsgees en kultuur vir die nageslag, máár goeie ontwerp moet die toets van tyd deurstaan. Dié boek bekyk uiteenlopende projekte van die afgelope 20 jaar wat deur die span van Mathews and Associates Architects ontwerp is. Pieter Mathews glo “a brick in a poetically designed building costs exactly the same as one in a mundane building”. Dié visie is die belangrikste in elke nuwe projek. Of dit ’n woonhuis, openbare gebou, kunsgalery, opvoedkundige instansie, tolhek, bushalte of brug is, alles moet voldoen aan die beginsels van kostedoeltreffende en goeie ontwerp. Openbare kunswerke van die land se voorste kunstenaars vorm deel van bushaltes in Pretoria se A Re Yeng-snelbusdiens en gee pendel ’n kulturele baadjie. Verbouings en nuwe geboue by die Afrikaanse Hoër Meisieskool in Pretoria vorm ’n naatlose skakel tussen die hede en die verlede. Wat ’n insiggewende terugblik op hoe argitektuur die landskap beïnvloed.