Kuberkuier: Portland, VSA
Woude, vulkaniese berge, riviere en woestynagtige dele omring Portland waar Duncan Cremer en sy gesin die afgelope ses jaar bly. Boetiekbier, kostrokke en road trips is hier baie gewild
Wat het jou na Amerika gelok?
Ek was in 2005 vir ses maande in Noord-Carolina as uitruilstudent. Saam met ’n paar ander Suid-Afrikaners het ek die wêreld platgetoer en dit baie geniet, maar nooit oorweeg om langer te bly nie. Vyf jaar later het ek vir ’n internasionale maatskappy met sy hoofkantoor in Oregon, in die noordweste van die VSA, begin werk. Die eerste paar jaar het ek gereeld vir werk Portland toe gekom en al hoe meer van die area begin hou.
Ek en my vrou, Suné, het altyd gedink dat dit ’n wonderlike avontuur vir ons en ons drie dogters sal wees om vir ’n paar jaar oorsee te gaan bly, maar nie die idee baie ernstig nagejaag nie. In 2015 het ons bekende wêreld in Pretoria in ’n oogwink verander toe ek die geleentheid kry om vir twee jaar in
Portland te kom werk en ons besluit om die avontuur aan te pak. Dit was amper ses jaar gelede.
Die area om Portland is ongelooflik mooi met woude, vulkaniese berge, die kuslyn (wat tog nie met SA s’n vergelyk kan word nie!) en woestynagtige dele.
Wat doen jy?
Ek werk in Nike se afdeling vir geïntegreerde sakebeplanning in ’n deel van die organisasie wat met LatynsAmerika, dele van Asië en die Stille Oseaan-eilande skakel. Ons fokus op risikobestuur en die belyning van verskillende beplanningsafdelings in die maatskappy. Ek werk saam met mense van reg oor die wêreld, wat die ervaring nogal uniek maak. Die afgelope jaar was dit veral interessant om te sien hoe verskillende lande, kulture en ekonomieë Covid probeer uitfigure het.
Amerika is bekend vir geleenthede en groot drome, nie waar nie?
Jy kan amper sê dat dit die nasionale etos van Amerika is en gegrond in die ideale van demokrasie, regte, vryheid, geleenthede en gelykheid. Hierdie ideale sluit natuurlik die beginsel in dat vryheid kan lei tot voorspoed en dat sukses en opwaartse mobiliteit bereik kan word deur harde werk. Baie opvallend is hoe patrioties die Amerikaners is. Ten spyte daarvan dat hulle ’n diverse lot is wat oor ’n baie groot geografiese gebied versprei is, is hulle grotendeels ’n nasie wat trots is op hul vlag, volkslied, land en wat hulle vermag het. Jaarliks op 4 Julie word elke Amerikaanse vlag uitgestal, parades gehou en ’n massiewe hoeveelheid vuurwerk geskiet ter viering van hul onafhanklikheid.
Vertel meer van die unieke vlag van Oregon.
Ja, miskien nie die mooiste vlag nie, maar beslis uniek en nou die enigste vlag van al die state met twee verskillende kante. Die een kant is blou-en-geel met die seël van Oregon daarop, omring deur 33 sterre. Die sterre verteenwoordig die feit dat Oregon die 33ste staat van die Verenigde State van Amerika geword het toe dit in 1895 ingelyf is. Aan die ander kant, ook blou-en-geel, is ’n bewer – die amptelike dier van Oregon.
Hoe groot is Amerikaners se persoonlikhede regtig?
Hier is so baie van hulle, dat jy regtig iets van alles kry. Hier en daar kom jy wel die “tipiese Amerikaner” teë, maar dit klink asof die “groter persoonlikhede” meer aan die oostekant van Amerika, soos in New York en Boston, bly.
Oor die algemeen is die mense baie vriendelik, ontvanklik en belangstellend, veral as hulle hoor jy kom van elders. Vreemdelinge sal sommer met mekaar gesels terwyl hulle in ’n winkel in
’n tou staan en wag of langs mekaar by kinders se sportwedstryde staan. Ons Suid-Afrikaanse aksente word gereeld uitgeken, wat nogal verstommend is en dalk ook ’n aanduiding van hoe wyd ons klein nasie oor die wêreld versprei is.
Enige struikelblokke wat julle ondervind het?
Met drie klein kinders het ons in die begin die ondersteuningsnetwerk van familie en vriende baie gemis. Omdat ek heelwat vir werk hierheen gekom het, dit ’n Westerse kultuur en meestal Engelssprekend is en jy al so baie daarvan op televisie en in rolprente gesien het, voel dit nie so vreemd nie. >