Skoonma trek in, aanlyn skelmpie en ander liefdesdilemmas

Skoonma meng in, die begroting is knap, konflik broei met almal onder een dak, en ai, al die daaglikse oorlewingsangs – hoe raak Covid-19 jou verhoudings- en sekslewe? Kenners gee raad vir vyf gróót kwelvrae

Dr. Marelize Swart, seksuoloog van Kaapstad, gee raad:

Wanneer een of albei huweliksmaats hul werk verloor, maak dit ’n duik in die huishoudelike begroting. Dit is ingrypend vir die hele gesin.

Navorsing wys mense – veral mans – wat hul werk verloor (of vrees dit gaan gebeur) se seksdrang verlaag. Dit is immers traumaties. Mans voel dikwels emosioneel “ontman” as hulle die broodwinner is en skielik nie vir hul gesin kan sorg nie. Vroue voel ook hulle skiet te kort as hulle op ’n dag hoor hulle kry die trekpas.

Geestesversteurings – angs, depressie en selfs posttraumatiese stres – is algemeen wanneer mense ná aflegging sukkel om geldelik te oorleef. Vroue moet mans se brose ego’s voed.

Mans moet vroue se selfbeeld opbou. Maar nie een van die twee het nou emosionele energie nie. En tussendeur moet die huishouding bestuur word, kos gekoop word, skoolgeld en elektrisiteit moet betaal word. En die feit dat niemand weet wat die toekoms inhou nie, vererger net alles. Gaan hulle weer werk kry? Gaan hulle dalk gedwing word om hul huis te verkoop? Hoe gaan hulle oorleef?

Enorme geldelike druk is nie bevorderlik vir ’n goeie sekslewe nie. Oorlewing is bo-aan jou prioriteitslys. Vir seker nie lang baddens met vanieljekerse en julle wat liefdeswoorde in mekaar se oor fluister nie.

Maar moenie alleen voel as jy in dié situasie is nie. ’n Studie deur die Kinseyinstituut in die VSA het bevind ’n jaar ná die begin van die pandemie het

43,5% van die deelnemers ’n afname in die gehalte van hul sekslewe ervaar.

Hou verwagtinge realisties. Jy en/of jou man gaan (waarskynlik) nie oornag nuwe werk kry nie. Beplan gerus ’n weeklikse “bekommernis-sessie”. Daar kan julle afpak en jul vrese teenoor mekaar bely. Wees eerlik. Wees spesifiek. Dan moet jy aanbeweeg en die res van die week probeer aanpak. Leef, indien moontlik, bewustelik. Jy kan nie dag en nag aan jou geldelike probleme dink nie.

Oorweeg dit om ’n finansiële konsultant te vra om ’n soort noodplan te help opstel sodat julle klein doelwitte kan bereik. Sê gereeld vir jouself dinge sal weer verbeter. Anders lyk alles oorweldigend.

Probeer om glad nie aan finansies te dink tydens seks nie. Fokus op die liefdespel. Haal diep asem. Brei jou definisie van intimiteit uit: hande vashou, soen, saam stort, lepellê en drukkies uitdeel is ook intiem. Jy hoef nie elke keer ’n orgasme te bereik nie.

En onthou, sielkundiges is altyd daar, as niks anders werk nie. >