Weg met daai maag
Om ontslae te raak van die rolle op jou maag kan soos ’n onoorkombare berg voel. Ongelukkig is dit ook die gevaarlikste plek vir vetjies om saam te pak. Dit verminder selle se sensitiwiteit vir insulien en vergroot dus jou kans op diabetes. En kan ook jou cholesterol en bloeddruk verhoog
MEER VESEL
Jy hoef nie ’n pak vol pruimedante te eet nie. Groen blaargroente, heelgraan, neute en bone help alles om die vet te troef wat diep in jou maag wegkruip. Kosse hoog in verfynde koolhidrate en suiker tem nie jou honger nie en maak jou net lus vir nog.
KIESKEURIG OOR VET
Moenie te min vet eet nie, maar fokus op die regte soort. Beperk versadigde vet in diereprodukte, kokosneut- en palmolie, en kry genoeg omega 3vette in: olieryke vis (soos salm, tuna en makriel), vlassaadolie, pampoensaad en okkerneutolie. Proteïene (vleis, vis, vars neute, kaas) is ook belangrik, maar kies diereproteïene met min vet.
OPSITTE ELKE DAG? NEE!
Net maagoefening gaan nie help nie. Jy moet 3-4 keer per week konsentreer op al jou spiere, en veral die groot spiergroepe (soos jou rug, bors, boude en dye). Kardiovaskulêre oefening is belangrik. Moet egter nie oor en oor dieselfde ding teen dieselfde tempo doen nie. Wissel dit af, bv. draf, stap, fietsry, swem, ens. En verander die intensiteit.
DIE GOUE LOKKIESFORMULE
Wanneer dit by gewigstoename kom, is slaap ’n bietjie soos pap. Te min – minder as 5 uur – kan meer maagvet beteken. So ook te veel – meer as 8 uur. “Net reg” is klaarblyklik 6-8 uur. As jy nie genoeg slaap nie, of rondrol, probeer ’n bietjie vroeër bed toe gaan, ontspan voor slapenstyd, hou jou slaapkamer koel en moenie voor bedtyd TV kyk of op jou foon/ tablet woeker nie.
ONTSPAN!
Gestres? Dit kan jou na vet en suiker laat hunker. Die streshormoon kortisol word boonop dan vrygestel, wat maagvet kan laat aanpak. Stres kan jou ook minder laat slaap en oefen en meer alkohol laat wegslaan, wat die rolle kan laat gedy. Vind gesonde uitlaatkleppe vir spanning.