ONSTUITBARE BANYANA-STER MAAK DROOM WAAR

Dis ’n storie van hoop, van vroue wat dikwels in patriargale huishoudings in townships grootword en nie glo hulle gaan ooit hul drome kan bewaarheid nie.

In Strike a Rock: The Thembi Kgatlana Story ( Jacana Media, R200), wat vroeër vanjaar verskyn het, gee joernalis Nikolaos Kirkinis die stories weer van die 25-jarige Thembi van Banyana Banyana en haar “susters” in die SuidAfrikaanse

vroue-sokkerspan. Dié doelgerigte vroue het hom eindeloos geïnspireer. “Hulle het soveel uitdagings om te oorkom.”

Ook Thembi, nou ’n internasionale ster wat ook vir Atlético Madrid in Spanje speel, se ouers was gekant daarteen dat sy in die stofstrate van Mohlakeng wes van Johannesburg haar drome najaag. Sy was egter onstuitbaar en het op 21 die Thembi Kgatlanastigting begin om die pad vir ander jongelinge in die township makliker te maak.

Nikolaos sê as mense meer boeke oor rolmodelle soos Thembi skryf, kan meer respek gekweek word vir al die vasbyters wat hul drome volg. “Dalk kan jy só ’n verskil help maak aan die verskriklike geslagsgebaseerde geweld wat baie vroue moet verduur.”