FREEK ROBINSON
Spesialis-onderhoudvoerder van LitNet Aktueel en afrigter van top-sakelui in TV-vaardighede
Ek sou graag wou lees dat: die regering sy plan laat vaar om die Grondwet te wysig om só onteiening van grond sonder vergoeding moontlik te maak. die ANC, soos verwoord deur pres. Cyril Ramaphosa, ná deeglike ontleding van tientalle openbarekonsultasie-sessies en duisende geskrewe insette tot die besef gekom het dat die meeste mense grondeienaars wil wees. ’n omvattende veldtog begin gaan word om grondhervorming te bespoedig. Dit behels die aktiewe betrokkenheid van kommersiële boere by die opleiding en ondersteuning van opkomende boere. Grond in staatsbesit sal eerste toegeken word aan verdienstelike mense wat wil boer en minstens basiese landbou-ervaring het. Ook boere op tradisionele grond sal eienaarskap kry.
Dit lyk al hoe meer asof die ANC nie die ondersteuning van die EFF in die parlement sal kry om die Grondwet te kan verander nie. Die voorstelle vir die radikale transformasie van die landbouekonomie word dan laat vaar. So ’n proaktiewe beleid sou letterlik oornag ’n verskil maak aan die motivering van boere, en ook voornemende buitelandse beleggers vastigheid gee.
Ek het min hoop dat die party ’n aktiewe ontwikkelingsplan in die plek daarvan sal instel.
Wat ek nie wil lees nie, is dat plaasmoorde op groot skaal bly voortgaan.