LOURENSA ECKARD

Joernalis en aanbieder van kykNET Verslag

Ek sou wou lees dat die munisipale verkiesings sonder enige ontwrigting plaasgevind het en dat alle SuidAfrikaners gaan stem het; dat die ANC by die stembus gestraf is vir jare lange korrupsie en wanbestuur; en dat die verskillende koalisieregerings wat na afloop van die munisipale verkiesings gevorm is, daadwerklik verskille opsy sal sit en saamspan om dienslewering te verbeter.

Ek dink die kans is skraal, hoofsaaklik omdat so baie SuidAfrikaners ontnugter is deur die politiek en te min kiesers waarskynlik sal stem. Namate die ANC verlam word deur faksiegevegte, is daar ongelukkig ook ’n moontlikheid dat munisipale verkiesings ontwrig kan word. Ek hoop regtig nie so nie.

Teen 2022 sal ons hopelik adjunkhoofregter Raymond Zondo se finale verslag oor staatskaping kry. Ek sal nie wil lees dat daar dadels van gekom het nie, nie wat betref die oudpresident se vervolging en optrede teen diegene wat prominent in die verslag genoem word nie.