Design Secrets
Kit Kemp
(Hardie Grant Books, R520)
Die Britse ontwerper dra haar boek op aan almal wat swaargekry het in 2020, en veral haar vriende in die gasvryheidsbedryf. Kemp doen die meeste van haar werk vir die bedryf. Sy is ’n stoere kampvegter vir Britse kuns, handwerk en beeldhou en werk gereeld aan projekte saam met leiers uit die onderskeie dissiplines. Met dié boek wil sy ’n saadjie plant van hoe jy nuut na binnenshuise ruimtes moet kyk. “Die beste vertrekke wil nooit hê jy moet hulle verlaat nie,” sê sy. Haar ontwerpgeheime deel sy visueel met kleurfoto’s van die verskillende elemente wat ’n goeie binneruim vereis. Die boek is propvol praktiese wenke. Die moets en moenies waarop jy moet let by die keuse van muurpapier en verf is besonder waardevol. Beslis ’n aanwins vir alle tuisteskeppers wat daarvan hou om hul woning mooi te maak.
Phyllis Green