Wildekus, Morné Malan (Lapa Uitgewers, R280)
Malan gooi jou saam met sy hoofkarakter, Adam Swart, in die binnekring van die rondswerwende gelowiges van die Lewende Vlees en laat jou saam met hom vrae vra oor geloof, die betekenis daarvan in mense se lewe en die redes wat hulle dryf om by ’n kultus betrokke te raak.
Die welgestelde sakeman se dogter,
Lea, het vier jaar tevore spoorloos verdwyn tydens ’n wegbreek aan die Wildekus. Pa en dogter het stry gekry oor die einste kultus se doen en late nadat hulle met hul verflenterde karavane en afgeleefde bakkies langs hulle kom kamp opslaan het. Adam se onverpoosde soektog na Lea bring hom terug na die Wildekus. En die Lewende Vlees. Hy vermoed sy is deel van die kultus, maar is dit vrywillig of is sy ontvoer?
Die roman ondersoek die verhouding tussen ’n pa en dogter, die dinge wat hulle van mekaar vervreem én wat bloed dikker as water maak. Phyllis Green