Die geheime lewe van Gita, Jacolet van den Berg (Lapa Uitgewers, R250)

Ontmoet Gita Bruwer: Iemand wat vir elke faset van haar lewe ’n ander mantel én lipstiffie het, van werk tot familie. By haar werk as joernalis is sy PienkGita wat skokpienk dra om haar eksentrieke baas te beïndruk. As kelnerin by die restaurant is sy SwartGita, wat ongesiens haar werk wil doen. By familie dra sy haar blinkkant-bo-baadjie.

Gita verkies om besig te bly. Hoe minder tyd sy het om na te dink oor wat sy regtig met haar lewe wil doen, hoe beter. Haar lewe word skielik op sy kop gedraai toe sy Darius, ’n amperblinde tjellospeler, en sy misterieuse broer, Brian, ontmoet. Terselfdertyd dwing stres by die werk en ’n familiedrama haar na Knysna. Daar moet sy diep in haarself en in haar verlede delf om uit te vind wie sy regtig is.

Al behoort Gita dalk tot daardie “ek is nie soos ander meisies nie”-groep, bly sy ’n wonderlike karakter in ’n hartroerende, moderne mondigwording-storie.

Carmen Coetsee