GÓÉD VIR JOU

1 KAKAOBOTTER (in donkersjokolade met 75% of meer kakao) is ryk aan ’n sekere vet, steariensuur. Jou liggaam absorbeer dit nie juis nie en dit kan dus nie jou cholesterol verhoog nie. Kakaobotter het boonop van dieselfde soort vet as olyfolie wat jou cholesterolvlakke in toom hou.

2 Hoe DONKERDER die sjokolade, hoe meer antioksidante bevat dit. Antioksidante het baie gesondheidsvoordele. Só kan dit die “goeie” cholesterol in jou liggaam verhoog. Dit is ook belangrik vir ’n sterk immuunstelsel en kan selfs ’n rol speel by ’n mooi vel.

3 Studies wys kakao (in goeie sjokolade met 60-70% of meer daarvan) bevat plantstowwe wat help om jou BLOEDDRUK te verlaag. Dit kan ook INSULIENSENSITIWITEIT (as jy insulienweerstandig is) en die gebruik van glukose (belangrik om jou gewig in toom te hou) in jou liggaam verbeter.

4 Hoe minder kakao jou lekkerny bevat, hoe minder gesond is dit. Wees op jou hoede: Sekere produkte het so min as 5% KAKAO . Die res is plantvette, suiker, melk en ander geurmiddels.

5 Hou MATIGHEID voor oë en geniet sjokolade in die plek van ander suikerbronne. Die mikpunt vir jou totale suikerinname – dus van alle bronne – is 3-6 teelepels per dag. Nog bronne wat “soet” proe, maar minder suiker per teelepel bevat, is heuning wat soeter as tafelsuiker is, so minder is nodig, agawe-suiker, en vrugtepulp en -puree.

6 Navorsing stel die gesondheidswaarde van donkersjokolade met 85% KAKAO gelyk aan vrugte s’n. ’n Blokkie ’n dag is dus góéd vir jou. Bron: Mariza van Zyl, geregistreerde dieetkundige van BeterEet, ’n aanlyn praktyk