HAAI- ambassadeurs
“Dis eintlik ’n wonderwerk.” ’n Seun van so tien by die Twee Oseane-akwarium in Kaapstad se Red ons seë-haai-uitstalling. Die akwarium het in 1995 met ’n program begin om ’n bewustheid van haaie se benarde posisie te skep. Dit was ná die vrylating van Maxine, ’n lywige skeurtandhaai van 190 kg. Ses maande later, toe haar merker ophou uitsaai, het sy reeds 600 km afgelê. Die voorafgaande agt jaar het sy die I&J-roofdieruitstalling by die akwarium gepatrolleer. ’n Fyn letsel agter haar kieue was die enigste teken van die haainette waarin sy voor haar gevangenskap aan die KwaZulu-Natalse kus verstrik geraak het. Net sowat 40% van skeurtandhaaie oorleef dit. Nog meer word jaarliks deur vissermanne van kant gemaak. ’n Nuutjie by die akwarium is Shark Alley, waar jy meer kan uitvind oor haaie se geheimsinnige gedrag en eienaardighede. Ook hoe ons dié unieke eienskappe uitbuit – wat baie haaispesies tot op die rand van uitwissing gebring het. “Shark Alley se boodskap is eenvoudig: Ignoreer die haaie se lot en die mariene ekostelsel, ons lewensondersteuningstelsel, kan ineenstort, sê Renée Leeuwner, die akwarium se bestuurder: kommunikasie en media.
Besoek aquarium.co.za