Só SÊ JY DIT
KORT EN KRAGTIG. Nie ’n lang preek nie. Laat blyk net die aanmerking of optrede is nie oukei nie. ’n Studie wat reaksies op homofobiese aanmerkings in die werkplek ondersoek het, het bevind die doeltreffendste soort konfrontasie is kalm maar direk: “Haai, dis nie cool nie.” ’n Soortgelyke benadering kan vir byna enige onaanvaarbare gedrag gebruik word.
TREK DIE ANDER OU SE SKOENE AAN Probeer die wêreld vanuit iemand anders se perspektief sien, dan is dit makliker om te praat en die gevolge te dra. Sommige mense is van nature meer empaties, maar ons kan almal meer empatie kweek. Per slot van sake, as jy geboelie of seksueel aangerand word, sal jy nie wil hê iemand moet vir jou opstaan nie?
IS DIT ’N GRAPPIE? Maak of jy dink ’n aanmerking was sarkasties, of as ’n grap bedoel. Iemand spreek hom uit oor vroulike politici en jy sê: “Ek weet jy maak net ’n grap, maar sommige mense dink regtig vroue is te emosioneel om president te wees.” Só maak jy duidelik jy stem nie saam nie, maar sonder dat hy voel jy konfronteer hom.
MAAK DIE ONGEMAK OOR JOU, NIE HOM NIE Verduidelik jou reaksie op ’n onsensitiewe aanmerking met ’n persoonlike verbintenis. “’n Goeie vriendin is op hoërskool seksueel aangerand, so grappies oor verkragting maak my ongemaklik.” Weer eens maak jy dit duidelik waar jy staan, maar sonder om hom op die agtervoet te plaas. Verwerk uit: Why We Act