SÓ KIES JY parfuum VIR JOU TROUE
Die nuwe jaar lê uitgestrek voor ons, met nuwe geleenthede, tendense en avonture om elke hoek en draai. Hier is inspirasie uit die wêreld van mode, skoonheid en kos, en ’n paar bekendes deel hul styl
Trou jy vanjaar? Onthou, ligter, varser geure is altyd ’n goeie keuse. Maak dit onvergeetlik deur ’n geur te kies wat inskakel by die omgewing waarin jy trou – of dit nou op die strand, in ’n tuin, ’n woud of die stad is. Die meeste parfuums is ryk aan blomnote. In kombinasie met note soos vanielje, suurlemoen of mimosa gee dit ’n unieke karakter aan ’n parfuum, wat dit die perfekte pasmaat kan maak vir die plek waar jy trou.
WATERGEURE
VIR DIE STRAND
Vang die vars, koel atmosfeer van ’n strandtroue vas met ’n parfuum met waternote. Hierdie kategorie geure is lig en daarom kan jy dit gereeld aanspuit sodat jy heeldag in ’n wolk van varsheid gehul is. Ander note wat herinner aan son, see en saffier is dié wat ’n eilandgevoel skep, soos ilang-ilang, jasmyn en bamboes. PROBEER 1. Dolce
& Gabbana Light Blue of Versace Dylan Turquoise
SENSUELE GEURE
VIR DIE STAD
’n Troue in die stad ontlok ’n gevoel van misterie. Daarom is ’n effens swaarder, sensuele geur gepas. Wees op die uitkyk vir ’n parfuum met note soos agarhout en amber. Vanielje sal ook altyd ’n wenner wees. Vir baie van ons is dit een van die eerste geure waarmee ons kennis maak, en daarom is dit gerusstellend en warm. PROBEER 2. YSL Black Opium
Extreme of Azzaro Wanted Girl By Night
SAGTE BLOMGEURE UIT ’N TUIN
Wie hou nie van blomgeure nie? Om die perfekte een vir jou groot dag te kies, put inspirasie uit die blomme in jou ruiker en in die tuin waar jy beplan om te trou. Die kans is goed daar gaan rose wees. ’n Roos is die “koningin van blomme” en skep ’n romantiese gevoel.
Ander gewilde blomnote is jasmyn, pinksterroos en soetemaling. PROBEER
3. Chanel No. 5 of Gucci Bloom Ambriosia di Fiori
SPRANKELEND EN VARS VIR DIE WOUD
Groen geure is vars en lig en jy kan dit heeldag lank aanspuit. Note soos komkommer en mimosa sal die aardse, natuurlike atmosfeer van ’n woud perfek vasvang. ’n Sitrusgeur sal ook goed werk vir ’n woudtroue of selfs as jy beplan om die ja-woord in die Bosveld te gee. Sprankelende note soos suurlemoen, lemmetjie, pomelo en lemoenbloeisel skep ’n feestelike gevoel, nes vonkelwyn en ’n tafel wat spierwit gedek is. PROBEER 4. Elizabeth Arden White Tea Ginger Lily of Chanel Chance Eau Fraîche