VOLGENS JOU gesigvorm
Vierkantig
Jy het ’n prominente voorkop en sterk kaak, en jou voorkop en wangbene is ewe of byna ewe breed. BEKENDES MET DIÉ GESIGVORM: Olivia Wilde, Sandra Bullock en Gwyneth Paltrow.
WEES OP DIE UITKYK VIR:
’n Ronder of ovaalvormige raam word aanbeveel vir balans. Dit gee ’n sagter voorkoms aan die sterk, vierkantige lyne. ’n Fyner raam is ook ’n beter keuse, en ’n kleurraam vat die fokus weg van die gesigstruktuur.
Rond
Jou gesig is min of meer ewe breed as lank, maar effens smaller by jou voorkop en kaak. BEKENDES MET DIÉ GESIGVORM: Kate Moss, Emma Stone en Mila Kunis.
WEES OP DIE UITKYK VIR:
’n Vierkantige of reghoekige raam. ’n Reghoekige raam “breek” jou gesigvorm en laat dit langer en dunner voorkom. ’n Vierkantige een gee struktuur aan jou gesig en komplementeer die vorm. Kies rame met uitspattige lyne en maak seker dat die onderste deel van jou raam net bo jou wangbene lê. Rame soos die katoog en wayfarer word ook aanbeveel.
Hartvormig
Jou voorkop is breed, jy het ’n dun, spits ken en hoë wangbene.
BEKENDES MET DIE GESIGVORM: Jennifer Aniston, Reese Witherspoon en Scarlett Johansson.
WEES OP DIE UITKYK VIR:
Wayfarer- en katoog-rame. Die geheim is om seker te maak dat die raam ’n bietjie breër as jou voorkop is. Rame wat op die onderste deel meer detail het, word ook aanbeveel (bottom-heavy frames). Ook rame met arms wat laer sit (low-set temples), veral as jy baie bewus is van jou voorkop en die aandag op die onderste deel van jou gesig wil hê. ’n Ovaalvormige raam beklemtoon jou oë as jy ’n skerp ken het.
Ovaalvormig
Jou gesig is langer as wat dit breed is. BEKENDES MET DIE GESIGVORM: Jessica Alba, Cate Blanchett, Kendall Jenner en Taylor Swift.
WEES OP DIE UITKYK VIR:
Oorgroot brille. Jy kan speel met vierkantige, reghoekige en geometriese raamvorms. Of kies iets uitspattigs wat by jou styl pas – soos kleure of teksture. Daar is min style wat nie by dié gesigvorm pas nie.