ONS DROOM OM . . .

– te onthou. As jy goed geslaap en gedroom het, werk jou geheue beter, het eksperimente bewys.

– jou brein werkend te hou. “Data” word in die vorm van gedagtes en gevoelens geskep. Jou drome is daarom ’n lukrake skermskut (screensaver ) wat keer dat jou brein afskakel.

– te vergeet. “Die doel van die REM-fase is om te help om jou geheue te herorganiseer. Wanneer ons droom, sif die korttermyngeheue deur gister se inligting en filtreer dit. Net sommige daarvan word in die langtermyngeheue gestoor,” sê Peet.

– te repeteer. As jy droom

’n bose karakter jaag jou, oefen jy jou vlug- of veg-instinkte vir wanneer jy wakker is. As jy oor jou aantreklike buurman droom, oefen jy klaarblyklik jou voortplantingsinstink.

– stres te hanteer. Drome versag pynlike ervarings en sorg vir sielkundige gesondheid. Posttraumatiese stresversteuring (PTSV) kan slegte slaap en minder drome veroorsaak. Jou droomgebrek kan bydra tot PTSV, glo sommige wetenskaplikes.

– probleme op te los. Realiteit en logika speel nie hier

’n rol nie. Jy kan al dromend oplossings vir probleme vind. Die Amerikaanse gholfspeler Jack Nicklaus het só ’n knaende probleem met sy gholfswaai opgelos.

– kreatief te wees. Drome inspireer. Sir Paul McCartney van die Beatles het byvoorbeeld die liedjie “Yesterday” so geskep.

Fisieke of psigiese siekte, medikasie, alkohol en dwelms kan jou drome beïnvloed. Onttrekking kan tot nagmerries lei.

As jou drome/nagmerries jou ontstel en wakker hou, kry hulp by ’n slaaplaboratorium, sielkundige of psigiater.