Salonbehandelings

Omdat hiperpigmentasie dikwels diep binne jou vel lê, vorm professionele salonbehandelings ’n belangrike tweede stap in jou aksieplan. Dié behandelings word die meeste aanbeveel:

CHEMIESE AFSKILFERING

Chemiese afskilferingsbehandelings met sure soos glikol-, melk-, aselaïen- en trichloorasynsuur (TCA) verwyder ’n aantal lae van jou vel om pigmentasievlekke oor tyd weg te skaaf sodat dit ligter lyk.

BREËBAND-LIG (BBL)

’n BBL-behandeling gebruik ligenergie van verskillende golflengtes om sekere kleurpigmente in jou vel te vernietig. Die resultate is dikwels dramaties en ’n groot deel van jou vel kan op ’n slag behandel word. Volgens dr. Lapiner werk dit uitstekend om die voorkoms van sonvlekke en sproete te verminder.

MIKRONAALDE

Volgens prof. Fernandes help ’n mikronaaldbehandeling om die voorkoms van pigmentasie te verbeter omdat dit kragtige bestanddele toelaat om dieper in jou vel in te penetreer. Die bestanddele onderdruk dan verskillende aspekte van die melanienvervaardigingsproses. Die behandeling is veral geskik vir melasma omdat die kans vir inflammasie kleiner is.

FRAKSIONELE LASER

Soortgelyk aan ’n chemiese afskilferingsbehandeling. Dié behandeling verwyder die boonste lae van jou vel deur middel van ’n laserstraal wat in talle kleiner straaltjies opgebreek word om ’n reeks mikrowonde te veroorsaak. Dit werk baie dieper en jy sal vinniger resultate sien, maar jy gaan dalk ’n paar dae hersteltyd nodig hê.