2 DIE TOWERGEURE VAN AFRIKA IN HARRODS
Op die sesde vloer van die luukse afdelingswinkel Harrods in
Londen, in die mees eksklusiewe vertoonlokaal vir die wêreld se topparfuums, kan jy deesdae ook geure koop met name soos Namaqualand, Kalahari, Blom, Kruger . . .
Dié parfuums, almal deel van die Aqualis-reeks, is die breinkind van die Suid-Afrikaner Steyn Grobler, wat dit onlangs ook plaaslik bekend gestel het. (Sien bl. 87.)
Steyn het verlief geraak op dié wêreld toe hy besig was met sy meestersgraad in sake-ekonomie aan die City University in Londen en deeltyds in Harrods se parfuumafdeling gewerk het. “Dit was met die finansiële ineenstorting in 2008, en ’n pos in die finansiële bedryf was nie ’n opsie nie. Ek was soos ’n kind in ’n lekkergoedwinkel tussen al die geure,” vertel hy.
Sedertdien het hy baie ervaring in die luukse-kleinhandelsmark opgedoen. Einde 2021, toe hy bedank het om slegs op Aqualis te fokus, was hy ’n verkoopsdirekteur van die Franse parfuumhuis Ex Nihilo Paris.
Aqualis pryk sedert 2020 in Harrods. “Dit het baie tyd, geld, slapelose nagte en deursettingsvermoë gekos. Ek het feesgevier toe ek die jawoord kry, maar die uitdaging is om daar te bly.”
Die Harrods-klant – 90% is van die Midde-Ooste – soek topgehalte. “Dit neem tot twee jaar voor ’n parfuum se balans perfek is.”
Mense is dol op die Suid-Afrikaanse inspirasie en betowering van Afrika. Elke geur het ’n storie. Kruger is sy topverkoper. “Paul Kruger was my ouma se oupa. Klante is gefassineer deur die erfenis-konneksie, dat ek die agteragterkleinkind van die eertydse president van die ZAR is. Ek wou iets skep wat ‘ruik’ soos die tekstuur van goud.”
Brentonș-on-Seaț, een van sy gunstelingplekke naby Knysna, bevat onder meer vars oseaannote en seesout. Namaqualand se blomgeure herinner hom aan sy ouers se blomkyk-dae. Die rooi sandduine van die Kalahari, waar sy ma vandaan kom, is geskilder met labdanum, leer en vanielje, met titsels framboos, rum en rosyntjiebos. Wees ook op die uitkyk vir sy nuwe Egoli-parfuum. – Suzette Truter
* By Skins Cosmetics-winkels of skins.co.za