TE VEEL KEUSES LEI TOT GEEN KEUSE
Vir iets-in-die-dertigs sanger Jan-Hendrik Fourie, wat nou naam maak met liedjies soos sy enkelsnit “Red my”, is die afspraaklandskap vandag veels te vol elektroniese keuses. “Dit maak ’n mens deurmekaar!” Hy het al afspraak-apps soos Tinder en Koer uitgetoets, maar gou besluit aanlyn hofmakery is nie vir hom nie.
“Dit is moeilik om iemand daar te vind vir ’n leeftyd van liefde.
Jy kan immers in ’n kits met een veeg van jou vinger links of regs ’n besluit afdwing. So leer ons eintlik net om mekaar af te skryf.”
Jan-Hendrik meen al ontstaan ’n verhouding uit ’n afspraak-app, maak al die ander beskikbare opsies dit juis moeilik om aan ’n verbintenis getrou te bly.
“Dis byna soos om aanhoudend met ’n stokkielekker in die hand in ’n lekkergoedsnoepie te verdwaal.”
Hy vind verhoudings op afspraak-apps is meesal net vervlietende kitsliefde.
“Ek weet jy kry mense met ongelooflike aanlyn liefdesverhale. Daar is egter ook lokvalle. Mense kan in die gewoonte van doelbewuste vermyding – sogenaamde ghosting – verval. Hulle aanvaar nie verantwoordelikheid vir wat in ’n verhouding gebeur nie. Dis nie my styl nie.”