Moets en moenies van eietydse romantiese verhoudings – ’n troostante se raad
MOENIES
Vermy die spieëltjie-spieëltjie-aan-die-wand-versoeking: Dis verbode om op ’n afspraak voor te gee jy is iemand wat jy nie is nie omdat jy jou eie selfies begin glo het. Let ook op as jou afspraakmaat dalk net te veel sy selfoon uithaal om vir jou foto’s te wys wat tegnologies aangepas is.
Loop lig vir spensrak-verhoudingsmaats: Sulke mense gaan op afsprake, lyk asof hulle in ’n verhouding wil belê, maar hou hul opsies oop om aan te beweeg. Maak seker die grense van jou verhouding is nie soos ’n grensdraad wat reeds platgetrap is nie. Hou perke in stand.
Die troetel van ou herinneringe is ’n nuutjie in verhoudings: Dit is nogal ’n hedendaagse geit dat sommige mense in nuwe verhoudings teruggryp na die goeie van gewese verhoudings. Julle gaan dalk tot jou ontsteltenis na ’n plek waar hy gelukkig was saam met ’n vorige liefde. Help hom met goeie beplanning om eerder nuwe dinge saam met jou te ontdek.
MOETS
Stap weg van Teemtert Anoniem: Dis deesdae soms mode om eerder neuroties oor alles in jou lewe en verhoudings te kla as om iets daaraan te doen. Begin deur aan jouself te werk as jy die geit wil vermy. ’n Gesonder jy sal gesonder verhoudings hê.
Vermy Covid-19 se emosionele meelopers: Blaam in veral mede-afhanklike verhoudings ná die inperkingstyd is ’n skommelstoel na nêrens. Wanneer dinge uitmekaar begin val, konsentreer daarop om jou verhouding te herstel pleks van om jou verhoudingsmaat te wil verander.
Doen moeite om verhoudingsmoegheid te beveg: Met ons besige lewens wat so op die tegnologie ingestel is, is dit soms ’n nuk om ’n verhouding sommer net sy gang te laat gaan. Vanselfsprekendheid is ’n drifdoder. Liefdesbande gaan nie vanself sterker word nie.