PAS ’N VASTE AFSPRAAKAAND IN
Joernalis in haar twintigs Eunice Stolz sê as jy paartjies vroeër gevra het hoe hulle ontmoet het, was hulle skaam om oop kaarte te speel indien die internet in watter vorm ook al Kupido gespeel het.
Deesdae erken maats die wegspringblok uit die staanspoor, want dit is tien teen een die tendens in hul portuurgroep.
Eunice meen die verskynsel van korttermynverhoudings ná internet-ontmoetings het tydens die Covid-19-pandemie toegeneem. Sy hou nie van die kortstondige aard daarvan nie. “Die hart beleef net so ’n soete beroering vir ’n oomblik en dan knip die wi-fi weer aan om te kyk wie is nog beskikbaar . . .”
Sy dink verhoudings word al hoe meer selfgesentreerd.
“Dit is nogal hartseer hoe die wêreld meer plek vir die individu, eerder as vir ’n paartjie, begin maak het.”
Sy glo paartjies moet sorg dat hulle tyd vir mekaar maak.
Vir haar is die gier van ’n vaste afspraakaand ’n bonus.
“Dis iets om na uit te sien as die lewe se sleur druk. Ek en my kêrel probeer altyd iets onvergeetliks op so ’n afspraak doen.”