LANGAFSTANDVERHOUDINGS KRY ’N NUWE BAADJIE

Die veertig-iets koerantredakteur Dawid Yzelle sê in sy vriendekring is die tendens om jou lewe en jou verhoudings vloeibaar te hou. Mense verander meer dikwels uit nood of om agter werk aan te skuif. Langafstandromanse is hul enigste opsie.

Hy glo sulke pendelende bemindes het meer as ooit vantevore buitengewone druk op hul verhouding.

“In terme van tyd en finansies is beminning oor ’n lang afstand ’n uitdaging. Dit is ook ’n ope vraag of afwesigheid werklik, soos die spreekwoord wil hê, jul liefde inniger maak.”

Hy vermoed afstand lei eerder tot gebrekkige kennis van mekaar. “Julle leer mekaar in sulke kort pakkies tyd ken waartydens jy dalk nie heeltyd jouself is nie. Ek dink nie dit is die gesondste ontwikkeling vir verhoudings nie.”