PROBEER ’N wimperbehandeling
Vir ekstra wimperhulp beveel Erika Davis, stigter en eienaar van die salongroep Erika Davis Aesthetics, dié twee professionele behandelings aan:
Lash Lift
Chemiese formules word gebruik om jou wimperhaartjies in ’n opwaartse rigting te set en die illusie van langer wimpers met ’n natuurlike krul te skep. Dit verg min instandhouding en jy kan steeds maskara dra. Die resultaat is vir ses tot agt weke sigbaar, na gelang van jou wimpers se natuurlike groeisiklus. BESTE VIR: Die behandeling is perfek as jy lang, reguit wimperhaartjies het. Dit werk ook goed om wimpers wat te veel krul meer reguit te “stileer”.
GETOETS DEUR MONICA
Ek kon nie glo watter verskil hierdie behandeling aan my voorkoms gemaak het nie. Dit het onmiddellik my oë oop en treffend laat lyk. Ek het vir ses weke byna geen maskara gedra nie en gereeld komplimente gekry.
Wimperverlengings
Vals haartjies word op jou eie wimperhaartjies geplak om hulle langer en voller te laat lyk. Soos wat jou eie wimpers vanweë die natuurlike groeisiklus uitval, val die vals haartjies ook af. Dit beteken jy sit so elke twee weke met gapings teen jou wimperlyn wat jy by ’n salon moet laat opvul. BESTE VIR: Diegene wat kort en min wimpers het en ’n tydelike oplossing, soos vir ’n spesiale geleentheid, soek.