Wat van ’n maskara-basislaag (primer) en -serum?
’n Maskara-basis vorm ’n gladde laag oor jou wimpers wat die aanwending van maskara makliker en meer eweredig maak. ’n Wimperserum bevat aktiewe bestanddele wat die haartjies versterk en vog inseël sodat jou wimpers gesonder lyk en beter groei. As jy sukkel met bros, swak en kort wimperhaartjies, kan ’n serum help. Jy moet die produk egter aanhoudend gebruik om resultate te sien. “As jou begroting ’n wimperbasislaag of -serum toelaat, bederf jouself, maar dit is nie vir my ’n noodsaaklikheid nie,” sê Annice. Jy kan ’n serum soggens of saans gebruik. Indien jy die serum soggens gebruik, wend dit eerste aan, gevolg deur ’n basislaag en jou maskara.