Ons storie word ons kliënte se storie
Terwyl Natalie Ellis modebemarking in Engeland studeer het, het sy besef daar is ’n skuif nodig in hoe verbruikers mode benader. “Ons gebruik organiese velsorgprodukte, ons eet organiese kos, maar ons dra sintetiese klere wat heeldag in kontak met ons vel is. Ons is geskok oor hoeveel kos vermors word, maar gooi ou klere weg sonder om twee keer te dink. Ek was ook betrokke by
Oxfam, wat hulle beywer om armoede te verlig, en kon nie meer wegkyk wanneer dit kom by ons houding teenoor mode nie.”
Haar sussie en deesdae haar sakevennoot, Kim, het ook in die modewêreld in Brittanje gewerk en dieselfde begin voel. Die twee het besluit om terug te kom Suid-Afrika toe en klere van omgewingsvriendelike en herwinde materiaal te ontwerp. So is The Joinery in 2010 gebore.
“Aanvanklik het ons natuurlike stowwe soos linne en hennep gebruik, maar gesukkel om dit plaaslik in die hande te kry. Toe besluit ons om ’n nuwe materiaal van plastiek te probeer vervaardig eerder as om materiale in te voer. Dit het maande se navorsing en ontwikkeling, in samewerking met ’n plaaslike herwinningsfabriek, geverg. Uiteindelik het ons ’n wonderlike vilt ontwerp en dit gepatenteer,” vertel Natalie.
Vandag het hulle al nagenoeg ’n miljoen plastiekbottels herwin om dié materiaal, Future Felt, te maak, waarvan hulle van pantoffels en plekmatjies tot handsakke en hoede vervaardig.
Die klein onderneming wat die twee susters oor naweke en saans in ’n geleende motorhuis op die been gebring het, het vandag 15 permanente werknemers en kry soms bestellings vir tot 100 000 produkte, sê Natalie.
“Wanneer ons sulke groot bestellings kry, sal ons tot vyftig naaldwerkers van naaldwerkkoöperasies op kontrakbasis inkry om te help. Verder werk ons saam met leerderskap-organisasies en leer mense nuwe vaardighede.
“Een só ’n werknemer wat begin het deur voorraad te tel en geen masjienvaardighede gehad het nie, is nou een van ons beste leerwerkers.
Ander het die vaardighede gebruik om hul eie onderneming te begin. Dis wonderlik om só ’n verskil in mense se lewens te kan maak.”
In die begin het die twee, wat in Kaapstad woon, hul produkte by markte daar verkoop. “Toe het ons bestellings vir boetieks begin maak en ’n aanlyn winkel begin. Korporatiewe kliënte het later begin navraag doen en ons het ál meer produkte, meestal geskenke vir hul kliënte, soos houers en sakke, volgens hul spesifikasies gemaak,” vertel Natalie.
Dié kliënte sluit deesdae groot name soos Coca-Cola, Spier en Investec in, en hulle voer nou ook produkte uit na hotelle en winkels in tot Swede en Sri Lanka. Hulle het ook al produkte in samewerking met Polo en Carrol Boyes ontwerp, wat in dié handelsname se plaaslike winkels verkoop word.
“Ons gewildste produk is ons groot drasakke met die woorde ‘Made from recycled plastic bottles’ op. Mense is gaande daaroor. Die pantoffels ook. Ons nuwer produkte soos skootrekenaarsakke is ook baie gewild.”
Natalie glo die produkte is so in aanvraag omdat hul werknemers vaardig is en uitstekende gehalte lewer, maar ook omdat mense aanklank vind by hul beginsels. “Ons storie word ons kliënte se storie. Deur ons produkte te koop en te verkoop, of self te dra, help hulle ook ander mense om nuwe vaardighede aan te leer en red hulle die oseane van plastiekrommel. Jy hoef nie duisende rande te skenk of groot projekte aan te pak om ’n verskil te maak nie, jy kan bloot beter keuses in jou alledaagse lewe maak soos om plaaslike en herwinde produkte te koop en jou eie rommel te herwin. En mense begin dit uiteindelik insien.”