MADIBA-MAGIC
Die huis in Houghton, Johannesburg, wat van 1992 tot 1998 wyle Nelson Mandela se tuiste was, is nou die Mandela Sanctuaryboetiekhotel (foto bo). Madiba het voor die 1994-verkiesing en tydens sy ampstermyn as president daar gewoon, en talle beroemdes soos die model Naomi Campbell, die basketbal-ster Magic Johnson en die sanger Michael Jackson onthaal. Dit was later die hoofkantoor van die Nelson Mandela-stigting. Groot dele van die huis is verbou, maar oorspronklike materiale is behou en regdeur die hotel gebruik. Elk van die nege slaapkamers weerspieël een van Madiba se vele fasette. In die voorportaal staan die groen stoel waarin hy soggens in die tuin sy koerant gelees het, en van sy gunsteling-maaltye soos beesstertbredie is op die spyskaart. Die kroeg en restaurant is oop vir die publiek. Bespreek vooraf by sanctuarymandela.com