BEETRISOTTO

(bl. 106) Net die kleur van hierdie risotto is genoeg om jou nog, nog, en nog, te laat skep.

genoeg vir 4-6

3 beetknolle, geskil en grofgerasper

750 ml hoenderaftreksel

45 ml botter

1 ui, fyngekap

2 knoffelhuisies, fyngekap

150 g risottorys

80 ml droëwitwyn

50 g parmesaankaas, gerasper, plus ekstra vir voorsit sout en varsgemaalde swartpeper

Plaas beet en aftreksel in ’n middelslagpot en bring tot kookpunt. Laat kook vir 20 minute. Pols tot gladde mengsel in ’n voedselverwerker of met ’n staafmenger. Verhit ’n skoon middelslagpot oor lae hitte en voeg botter by. Voeg uie en knoffel by en braai vir 5 minute of tot uie sag is. Voeg risottorys by en braai vir 2 minute. Voeg wyn by en braai nog 2 minute. Gooi die aftreksel (met die beet) by die rys, alles op een slag (ek weet ek breek al die reëls van risotto maak). Bring tot kookpunt en kook vir sowat 20 minute of tot die rys die vloeistof geabsorbeer het. Roer elke 3 minute net deur. Verwyder van hitte, voeg parmesaankaas by en meng deur tot gesmelt. Proe en geur met sout en peper. Sit warm voor met ekstra parmesaankaas.