NOG OORSAKE VAN VERGEET
DEPRESSIE
“Veral saam met angs kan depressie ’n effek hê op jou vermoë om helder te dink, te konsentreer en besluite te neem,” sê Anton.
STRES
Hoë stresvlakke kan reeds voor 50 tot geheueverlies en ’n gebrek aan konsentrasie lei.
Waar die streshormoon kortisol gewoonlik ná ’n krisis afneem, gebeur dit nie in die geval van langdurige stres nie.
VLIEG
As jy gereeld tussen tydsones moet vlieg, rus liewer tussenin vir twee weke om vlugflouheid ( jet lag) te oorkom.
JOU SWAK PUNTE
As jy geneig is om name te vergeet, probeer emosie bysit. Min vroue, jonk of oud, sal die aantreklike George Clooney se naam vergeet.
DIE TAAK HET OUTOMATIES GEWORD
Terwyl jy bestuur dink jy dalk aan ander dinge en vergeet om af te draai, of maak ’n ongeluk.
TRAUMA
Vergeetagtigheid is ’n kernsimptoom van posttraumatiese stresversteuring (PTSV), sê dr. Rabe. Jy probeer die tragedie blokkeer en vergeet dan klein dingetjies. “Dis oorlewing en beskerm jou van sielkundige skade. Kry professionele hulp vir trauma.”
JY SLAAP TE MIN
Slaap verwyder gifstowwe uit die brein wat gedurende die dag opbou. Uitputting kan lei tot gebrekkige konsentrasie en vaslegging en jy kan sukkel om herinneringe op te roep.
MEDIKASIE
Sekere antidepressante, kalmeermiddels en bloeddrukpille kan jou lomerig en vergeetagtig maak. Daar is alternatiewe. Te veel alkohol kan jou korttermyngeheue aantas.
’N ONDERAKTIEWE SKILDKLIER
Laat doen ’n eenvoudige bloedtoets. Medikasie kan help.