Vertel meer oor Salomé se karakter en hoe jy haar geskep het.

Salomé is ’n wisselvallige, meestal koue ma wat ondanks haar beste pogings dit nie regkry om vir haar kinders deurlopende warmte en onvoorwaardelike liefde te gee nie. Haar kinders is vir haar bloot verlengstukke van haarself of ’n spieël in wie sy ’n gunstige beeld van haarself wil sien terugkaats. Sy kry nie hulp vir haar geestesgesondheidsprobleme nie en syself en haar gesin ontgeld dit.

Ek het onlangs ’n fliek genaamd

The Lost Daughter gekyk waarin Olivia Colman die rol vertolk van ’n ma wat ambivalent voel oor moederskap en haar twee dogters erge emosionele letsels toedien. Daar was opmerklike ooreenkomste tussen haar en Salomé. Ons is so gewoond aan die argetipiese rol van die sagte, liefdevolle ma dat dit onthutsend is om ’n ma-karakter teë te kom wat dit nié is nie. Vertel ons meer van die liefde-haatverhouding tussen Rakie en haar tweelingsuster, Mara.

Rakie en Mara kan nie met mekaar saamleef nie en kan ook nie sonder mekaar nie. Die twee is baie lief vir en afhanklik van mekaar, maar dryf mekaar ook teen die mure uit. Mara en Rakie is mekaar se teenpole: lig en donker, veilig en gevaarlik, bang en waaghalsig. Hulle trek mekaar aan, maar stoot mekaar ook af. Wanneer hulle saam is, is alles onstabiel en plofbaar.