Oorsig oor Heidelberglandbouskou
HEIDELBERG Die Heidelberg-landbouskou het vanjaar ‘n groot verskeidenheid en goeie kwaliteit uitstallers vanaf Woensdag 7 tot Saterdag 10 Februarie gehad.
Volgens die stalletjie sameroeper, Loret Truter, was daar baie nuwe uitstallers en was die saal stampvol. Die industriële uitstallings het ook vir die eerste keer vragmotors ingesluit. Jak de Priester het Donderdag vir ongeveer 130 dames by die landbouskou se oggendtee gesing. Die saal was pragtig versier deur Carien Dippenaar en heerlike eetgoed is voorgesit. Die skou het weereens baie deelnemers in alle vee-afdelings. In die perde-afdeling is met ongeveer 180 perde geskou. Deelnemende rasse was Hackney en Walliese ponies, Hackney, Vlaams en Ope. Volgens die sameroeper, Hans Jurie Uys, was hoogtepunte die Hackney groot kampioen enkeltuig wat gewen is deur Abdullah Davids met Marocco Miss World, die twee agtspan Vlaamperde van Jurie Uys (kampioen) en Maartin Eksteen (reserwe kampioen) en die Walliese ponie agtspan van Hans Jurie Uys (kampioen). Hackney ponie groot kampioen siertuig is gewen deur Sayeed Davids met Wild at Heart en die opekampioen vyfgang deur Samjak Mekalaar van Samjak SA Boerperd
Stud, met Manon Brink-Volschenk as ruiter. Die kompetisie was baie straf by die slaglamkampioenskap en volgens skoukomiteelid Uys Willemse was die 352 merino inskrywings ‘n groot verrassing, met 108 inskrywings vir die slaglamkampioenskap. Willemse is deur die vleisprodusent instansie, Samic as die slaglam kampioen aangewys met sy lam wat aan die haak 48,9% en 21,9 kg uitgeslag het. Die lam is dan ook Vrydagaand by die biertuin opgeveil en die bod is toegeslaan op Simon de Jager teen ‘n stewige R5 000. Die Jeugskou het van verlede jaar se 43 deelnemers tot vanjaar se 155 gegroei en is 10 klasse aangebied naamlik suiwel- en vleisbeeste, wol- en vleisskaap, angora-, boeren melkbokke, perde, pluimvee en kulinêre kuns. Dit is die tweede streekjeugskou wat aangebied word. Volgens een van die organiseerders, Natasha van Deventer, word net ‘n sekere hoeveelheid streekskoue in die Wes-Kaap aangebied waar kinders punte moet verwerf volgens hulle plasings. Die bestes in die streek word gekies vir die WP-span wat deelneem aan die nasionale kampioenskap later in die jaar teen nege ander provinsies. Ricus Nel het die landbouskou op ‘n hoë noot afgesluit en die gehoor was gaande oor sy vertoning. Die biertuin was vol en nagenoeg 257 biefstukke en 99 kleiner etes is tydens die aand verkoop deur die kombuis wat due Hoërskool Heidelberg behartig is. Vir 'n video-onderhoud met hom, gaan na ons webtuiste by www.suidkaapforum. com Volgens skoupresident, Vic Brand, was die skoudans die vorige week vantevore uitstekend. Hoogtepunte vir hom by die skou was die Jeugskou, damesoggend, steakhouse en die rekordgetalle by die merino skaapskou en Ricus Nel se optrede. "Ek wil ook net baie dankie sê vir al die borge wat die Heidelberg Landbouskou ondersteun het.” • Suid-Kaap Forum maak verskoning vir die verkeerde presidentsboodskap en Jeugskou-berig wat in verlede week se uitgawe verskyn het.