“Presies wat ons wou hê”

Dis die tweede opknap vir dié en suite sedert die eienaars hier ingetrek het. En nou het hulle vyfstergemak!

IIn ’n badkamer met ’n uitsig op Leeukop en Vlaeberg ontaard seep smeer in terapie. Vra maar vir Sarah Curtis-Bowles en haar man, John Bowles, van Oranjezicht, Kaapstad – want hul badkamer is nou louter lafenis. Vir dié paartjie is huis mooimaak allermins ’n onbekende konsep. Nadat hulle in 2009 hul romantiese Victoriaanse huis uit die vroeë 1900’s gekoop het, het hulle vir hul slaapkamer ’n en suite-badkamer geskep. En die volgende paar jaar was die ruimte nommerpas. Maar toe hulle in 2014 hul hoofslaapkamer vergroot, het dit ’n nuwe badkamer-uitleg genoodsaak. Dit kon hulle uiteindelik verlede Januarie doen.