KLEURVOLLE BEKORING
#1 Perfek in pers
Dekor wat ’n storie vertel, handgemaakte skeppings en interessante versamelings vier hoogty in Anisa du Plessis se huis in Johannesburg; ook in haar weelderige en suite. “Ek glo nie alles hoef simmetries te wees nie, en het verskillende spieëls bo die twee wasbakke gekies. Dis net soveel interessanter.”
Anisa het ’n ou buffetkas gekry, nuwe knoppe aangesit en haar vriend Riaan Smit het dit vir haar geverf. “Die eerste wasbakke wat ek gekoop het, was te hoog vir die kas, toe moes ons dit gaan omruil – dié twee is perfek,” sê sy. Die pers mure weerspieël Anisa se liefde vir kleur en bring balans met die liggrys mure in die res van die vertrek.