Nog inspirasie
1
Plakpapier is nie net vir mure nie – dis ook ideaal vir deure, soos Lisa Peters se gastebadkamer in haar huis in Oranjezicht, Kaapstad, bewys. Sy het die Graham and Brown-plakpapier met ’n flamink-motief op die mure gebruik en op die binnekant van die deur herhaal, met groot trefkrag.
2
Mosaïekteëls straal ’n gevoel van weelde uit en kan tydloos wees. Dié badkamer met sy monochroom blou mosaïekmure is meer as 10 jaar gelede oorgedoen, maar lyk steeds vars. Saam met eenvoudige dog klassieke bykomstighede is dit vandag nog ’n apploustrekker in dié Kaapse woonstel.
3
Graffiti-kuns val miskien nie in almal se smaak nie, maar Juanne-Pierre de Abreu van Seepunt het die kans aangegryp toe hy dié teëls uit ’n gestaakte reeks teen ’n winskoop kry. Die en suite het nie vensters nie; daarom is daar net ’n glas-afskorting tussen die badkamer en slaapkamer. Dit hou vog uit die slaapkamer en verseker dat die badkamer genoeg natuurlike lig kry. Vir privaatheid kan die skuurdeure wat na die sitgedeelte lei, eenvoudig toegetrek word wanneer hy gaste kry. >>