[V&A]
met Nico en Lizelle
Wat is jul raad aan iemand wat hul eerste opknapprojek
aanpak? Gebruik ’n betroubare bouer! En moenie jou idees gedurende die proses verander nie. Dit gebeur maklik dat jy mooi goed op Pinterest sien en dan ’n ander rigting wil inslaan. Vertrou jou instink – jy weet waarvan jy hou.
Hoe het julle die beste produkte en dienste opgespoor en sal julle sommige hiervan by ander opknappers aanbeveel? Dit verg maar net navorsing. Kyk na gehalte en prys; laasgenoemde hang af van die waarde wat die item bied. Ons dink al die produkte wat ons gebruik het, is uitmuntend; wat die proses selfs nog lekkerder gemaak het, was die uitstekende diens van die verskaffers wat ons gekies het.
Julle het al vantevore gerestoureer – dink julle ervaring maak ’n opknapprojek makliker? Ons het al klein projekte aangepak soos om die huis te verf, maar niks op groot skaal nie. Selfs dié projek was redelik klein. Tog leer ’n mens elke keer iets by.
Enige geldspaarwenke vir ander opknappers? Soek so wyd moontlik. ’n Mens kan dieselfde artikel vir veel goedkoper opspoor as jy mooi soek. Die stortkop was byvoorbeeld amper drie keer die prys by ’n ander verskaffer.
Wat is volgende aan die beurt? Ons huis is aan die klein kant en bêreplek is min; daarom beplan ons ’n moderne stoorplek in die tuin. Ons houtvloere kort beslis ook ’n bietjie liefde.