Oorweeg jy die sementvoorkoms?
Inez se badkamermure en -vloer is afgewerk deur Crete and Wall Creations, wat in gekleurde sementvloere en afgevlakte mure spesialiseer.
“Nadat die teëls verwyder en die oppervlakke met ’n diamantslyper glad gemaak is, het ons ’n liggrys afvlaklaag oor die bestaande sement op die vloer en ’n liggrys gespikkelde pleister teen die mure aangewend,” vertel die eienaar, Manie Vermeulen. “Daarna is die vloer en mure waterdig gemaak met ons eie produk, gevolg deur twee lae poliuretaanseëlaar.”
Hy sê hul produkte kan ook oor teëls gebruik word, mits dit nie gekraak is nie. “Ons skuur die teëls eers deeglik en bedek dit met kraakwerende veselmaas voor ons ’n 4–5 mm-afvlak- of sementlaag aanwend.”
Die kleurpleister en die kleursement vir vloere kom in meer as 20 kleure. >>