KENNERSRAAD
Vir die beste uitsig
Skuif- en stapeldeure is albei goeie opsies om binne en buite met mekaar te verbind, sê Cobus Lourens van Swartland Windows and Doors.
“Skuifdeure neem minder plek op as stapeldeure wanneer dit oop is en danksy groot panele bied dit ’n onbelemmerde uitsig. Maar onthou, ’n skuifdeur maak gewoonlik net die helfte van die deurgang oop,” sê hy. “Hoewel stapeldeure die hele ruimte oopstel, kan die smaller panele dalk die binne-buite-gevoel effens belemmer wanneer dit toe is.”
Wat materiaal vir die deurrame betref, is Cobus se topkeuses aluminium en hout. “Poeierbedekte aluminium is ’n bekostigbare, ligte en duursame materiaal wat roesbestand is. Die rame is ook smaller, vir ’n minimalistiese voorkoms. Hout bied weer ekovriendelike voordele (indien dit van volhoubare aanplantings kom), dit het uitstekende isolasie, is duursaam en het ’n ryk, warm voorkoms. As dit met ’n waterbasis-verseëlaar behandel is en reg onderhou word, behoort jou houtdeure jare lank goed te lyk.
“Terwyl ’n verseëlaar die hout teen waterskade sal beskerm, is dit raadsaam om aanraking met water so ver moontlik te beperk,” sê Cobus. “Draai daarom jou stortkop weg van die deur indien moontlik.”